Премиерот Ковачевски стапи на должност, новите министри ги преземаа функциите, ново поглавје од серијалот „Умри машки“

ВЕСТ НА ДЕНОТ

Ковачевски ја презеде премиерската функција од Заев

Новоизбраниот претседател на Владата, Димитар Ковачевски денеска ги презеде функцијата и кабинетот од досегашниот премиер Зоран Заев. Премиерот во заминување Зоран Заев на претседателот на Владата на Република Северна Македонија Димитар Ковачевски, нему и на министрите им посака успех во работата и исполнување на програмата и приоритетите на новата Влада за наредниот период. Претседателот на Владата Димитар Ковачевски му се заблагодари на неговиот претходник Зоран Заев за исклучително позитивните остварувања во претходните два мандати и за поддршката во процесот на формирањето на новата Влада.

ИЗЈАВА НА ДЕНОТ

Новата министерка за одбрана, Славјанка Петровска, денеска на примопредавање на функцијата од претходничката Радмила Шекеринска

Петровска: Членството во НАТО е признание за вашата работа и еден од најважните делови во поновата македонска историја. Но, членството во НАТО не е само признание на политичките процеси кои се случуваа, туку и на подготвеноста на нашата Армија да ги прифати НАТО-стандардите и принципите на дејствување и постапување на Алијансата. Свесна за досегашниот влог, целосно почитувајќи ги резултатите од реформите и постигнатиот напредок, пред мене стои сериозен предизвик – да го сочувам она што досега е постигнато и истовремено да бидам политички двигател во процесите кои ни претстојат. Тоа е мојата обврска кон граѓаните, кон припадниците на Армијата, кон принципите на кои се заснова нашето членство во НАТО“, посочи во обраќањето министерката Петровска.

ФЛЕШ ВЕСТИ

СРЕДБИ Претседателот на Владата Димитар Ковачевски денеска ја прими амбасадорката на Соединетите Американски Држави, Кејт Мари Брнз.Амбасадорката Брнз му го честиташе изборот за премиер на Димитар Ковачевски и му посака успех во спроведувањето на програмските цели на новиот владин кабинет меѓу кои соработката со САД, како стратешки партнер на Република Северна Македонија е во врвот на приоритетите на меѓународната политика на земјата.

На состанокот со министерката Ана Лирман, на кој присуствуваше и министерот Бојан Маричиќ, премиерот Ковачевски изрази благодарност што новоизбраната влада на СР Германија, предводена од канцеларот Олаф Шолц, го стави проширувањето на ЕУ со Западен Балкан високо на нејзината коалициона програма и особено што експлицитно ја нагласи потребата без натамошно одложување да се отворат првите преговарачки поглавја со Северна Македонија и Албанија како следен чекор на проширувањето на ЕУ кон регионот.

Претседателот Стево Пендаровски денеска ја прими Ана Лирман, државна министерка за Европа во Министерството за надворешни работи на Сојузна Република Германија. Пендаровски оценил дека посетата на министерката Лирман набрзо по нејзиното именување, ја демонстрира јасната посветеност на германските власти за аспирациите на државите од Западен Балкан за членство во Европската Унија. Тој се заблагодарил што проширувањето на Европската Унија и Западниот Балкан се меѓу клучните приоритети на новата Влада на канцеларот Олаф Шолц.

ПРИМОПРЕДАВАЊЕ Новите министри ги преземаат функциите од нивните претходници. Досегашниот министер за правда, Бојан Маричиќ денеска во Министерството за правда ја предаде министерската функција на својот наследник проф. д-р Никола Тупанчески, новоименуваната министерка за Труд и социјала, Јованка Тренчевска ја презеде функцијата од досегашната министерка Јагода Шахпаска, nовата министерка за одбрана, Славјанка Петровска, денеска на примопредавање на функцијата од претходничката Радмила Шекеринска.

ЧЕСТИТКА Бугарскиот премиер Кирил Петков му го честиташе на Димитар Ковачевски стапувањето на должноста премиер на Република Северна Македонија и и посака успех на Новата влада во Скопје.

КОНТРАСПИН Ковачевски нема врска со поскапувањето на цените на струјата, парното и метанот. Ковачевски како лидер на партија не може да биде дел од одлуки за поскапувања во енергетиката, а зголемувањето на цените на струјата и гасот не се ниту своеволна желба на Владата. Ваквите одлуки ги носи Регулаторната комисија за енергетика, пишува „Вистиномер“ во својот Контраспин.

ИЗВЕСТУВАЧ Германскиот политичар со босанско потекло, од редовите на владејачката Социјалдемократска партија (СПД), Адис Ахметовиќ е новиот известувач на Бундестагот за Западен Балкан, кој порачува дека за зачувување на мирот во Европа се важни мирот и стабилноста на Балканот, особено во БиХ.

ВИСТИНОМЕР Со руско видео се дезинформира дека ученик починал по примена Спутник вакцина. На почетокот на декември 2021 година, во училиште во московскиот регион, 17 годишен студент починал на час. За смртта има две причини кои циркулираат во руските медиуми, но ниедна не е вакцината против ковид-19. Во извештаите од руските медиуми не се ни споменува дали момчето било вакцинирано или не. Едната причина на која работат форензичарите е срцев удар, а втората откачен тромб.

ДИСТРИКТ

Во ДИСТРИКТ на Цивил Прес Студио – интервју на Зоран Иванов со Петрит Сарачини.

Сарачини зборува за себе и личните битки, кратките нозе и долгите лаги, заканите и одбраните, шарената и ефектите, лажните вести и правните алатки, Отворен Балкан и затворена Европа и, секако, и за уште по нешто.

ЕДИТОРИЈАЛ

Назад, пардон, напред во Северна Македонија! Освен во парламентот, каде што има нешто подобра, но далеку од правична родова застапеност (73 мажи и 47 жени), на сите други позиции има тотална машка доминација. Од 81 градоначалници во земјава, по локалните избори во октомври, 2021, само две се жени. За родовата застапеност во претходниот мандат на локалните власти велевме дека е катастрофална, ама имаше „дури“ пет. Значи, можело и полошо.

Како и да е, пред владата на Ковачевски стојат огромен број предизвици и на надворешен и на внатрешен план. Голем дел од патот му го истапка Зоран Заев. Тој рече дека ќе се фати за работа веднаш (а кога инаку?), на првиот ден (17 јануари). Обично, првите 100 дена му се даваат на премиерот и на неговиот кабинет да покаже што и колку може. Но Ковачевски, како ни Заев пред него, нема да ги добие тие 100 дена.

Во македонскиот случај, со ВМРО-ДПМНЕ веќе пет години во опозиција, а опиени од успехот на локалните избори, Ковачевски нема лесна задача. Тој и пред да стане премиер беше мета на жестока црна пропаганда од моментот кога неговото име проструи во јавноста. Опозицијата го одрекува неговиот легитимитет. И тоа доаѓа токму од оние што се носители на легитимитетот – пратеничките и пратениците во парламентот. И – тоа не е ништо., пишува Џабир Дерала во едиторијалот „Ковачевски во новото поглавје од серијалот „Умри машки“

СЛОБОДНА ЗОНА

Всушност, таа порака токму соодветствува на неочекуваната стаписаност на опозицијата од реалната опасност Данела Арсовска да му ја „украде“ сценската слава на Ковачевски со покажаните зачудувачки знаци не само на менаџерско неснаоѓање, туку и на блага политичка незаинтересираност за вршење на првата градска функција, дефокусирајќи ги опозициските пропагандни напори за брзи вонредни парламентарни избори заради претпоставената неуспешност на власта на „пиунот на Заев“…

Како што почна со својот мандат, „кралицата на Мицкоски“ до сега не покажува дека разбира оти, ако ништо друго, во политиката треба барем да оставаш впечаток дека си загрижен за решавање на проблемите, бидејќи во спротивно проблемите почнуваат да те решаваат тебе. Ако се прогласиш за ненадлежна за ништо важно – загадување, транспорт, греење, емпатија… – тогаш и потценетиот „пиун“ брзо ќе стане „кралица“, таа, пак, ќе ги урниса амбициите на својот „крал“, а сомот ќе продолжи слободно да плива откачен од јадицата на моќта.

Ехееее, има за тоа метафори и алегории колку сакате! Шаховските партии во нашава политика полесно се губат одошто се добиваат, читајте во новата колумна на Сашо Орданоски „Рибарски приказни за неуловените дебели политички сомови“.

„Со Бугарите ти е како на почетокот на секој брак. Маглата на емоциите ни ја замаглува сликата на состојбите и она што може да се очекува. Мажот ја гледа жената и очекува таа да му остане иста и да не се менува. Но таа по неколку месеци почнува да се менува и се менува долго по медениот месец. Жената уште од почетокот длабоко се надева дека ќе го смени мажот и ќе го прилагоди на своите сонови од моминските денови. Тој само на почетокот покажува намера да се менува, но за неколку години тој се враќа кон неговиот свет и не се менува многу. Во тој судир останува да се толерираат сопружниците и да балансираат меѓу својот свет и реалноста на бракот“, пишува Војо Маневски во колумната „Дочекување“

И, ги остави скопјани да се смрзнуваат. И ако градоначалничката и градските власти се прогласија за ненадлежни и без ингеренции за решавање на проблемите со парното греење во Скопје, сепак, ако ги прочитаат надлежностите на град Скопје, во член 10 стои дека во надлежностите на градот спаѓа снабдувањето со природен гас и топлинска енергија. И овој проблем, градоначалничката ноншалантно си го изигнорира, и остави затоплувањето на граѓаните да го решава Владата. Навистина, освен што се занимава со именување на партиски членови во управни одбори, вработување на партиски војници, игнорирање и опструкција на започнатите проекти од минатото градско раководство од круцијално значење за подобрување на квалитетот на животот на Скопјани, што всушност работи градоначалничката? Ах, да, ги заборавив двата капитални проекти, нивелирањето на неколку шахти по скопските улици и поставување на мобилни тоалети на Кеј, пишува Драган Мишев во колумната „Parlez-vous français за Скопје, Данела“