Во Државната изборна комисија (ДИК) денеска (13 септември), пристигна серверот потребен за користење на системот со кој на претстојните локални избори гласачите ќе се идентификуваат со отпечатоци од прст. Вчера (12 септември) ДИК објави дека вкупно 297 кандидати за градоначалници и кандидатите на 546 листи за советници ќе влезат во изборна трка во 80 општини и Град Скопје на локалните избори, закажани за 17 октомври.
И денеска политичките партии продолжија да се препукуваат за тоа кој е виновен и кој треба да даде оставка за трагедијата во Тетово…
ПАРТИСКО ПРЕПУКУВАЊЕ
И денеска продолжува партиското препукување околу оставката на министерот за здравство Венко Филипче, по трагедијата во тетовската болница каде во пожар загинаа 14 лица.
ВМРО-ДПМНЕ денеска со четири соопштенија, едно по друго, побара оставка од Венко Филипче и Илир Хасани, но и од премиерот Зоран Заев за трагедијата во Тетово.
„ВМРО-ДПМНЕ ги повикува партиите од власта: БЕСА, ЛДП, ДОМ, ДС и ДПА да не го штитат Филипче и да изгласаме негова смена“, велат од опозициската партија.
Со ист став излезе и лидерот на Алијанса за Албанците, Зијадин Села и повика да не се врши притисок врз истрагата.
„Како да не беа доволни 14-те живи запалени жртви, владата наместо да обезбеди праведни истраги и случајот да не се повтори, таа се обидува да се амнестира преку закани и уцени. Изминативе денови и понатаму се врши притисок над семејствата на жртвите и лекарите во болницата во Тетово.
Ве повикувам итно да престанете со таквите притисоци, оставете ги истражителите да ја завршат својата работа без политичко мешање. Почитувајте ги жртвите и нивните семејства, како и медицинскиот персонал што веќе сте го оставиле да работи во тешки-мизерни услови“, вели Села.
Од СДСМ велат дека во време на национална тага и целосна мобилизација на институциите за расветлување на случајот, Христијан Мицкоски и ВМРО-ДПМНЕ сакаат да профитираат на сметка на трагедијата.
„Недозволивата политизација на трагедијата го покажа политиканството и непознавањето на Уставот и законите од страна на Мицкоски. Уставот на државата е јасен, член на Владата може да поднесе оставка, но пред премиерот. Претседателот на Владата може да предложи разрешување на член на Владата, а за предлогот за разрешување Собранието одлучува на наредната седница. (член 94, Устав).
Мицкоски и ВМРО-ДПМНЕ се однесуваат неодговорно, сето тоа е доказ за очајот во кој е западнат Христијан Мицкоски. Заврши времето кога политиката доминираше над правото“, велат од СДСМ.
КАМПАЊА
Кандидатот за градоначалник на Општина Бутел од ВМРО-ДПМНЕ, актуелниот пратеник Дарко Костовски, побара општината да престане со градежните активности и да ја дислоцира модуларната амбуланта.
„Станува збор за ист тип на модуларна амбуланта како онаа во Тетово изградена од иста фирма блиска до власта“, истакна Костовски.
Актуелниот градоначалник на Општина Шуто Оризари, Курто Дудуш, е кандидат за уште еден мандат од редовите на коалицијата ЛДП-ДОМ. Во изминатите денови, во попладневните часови остварува средби со жителите на населбата.
ЗЕЛЕН ХУМАН ГРАД НА ТЕРЕН
Носителите на Советничката листа на Зелен хуман град на Фејсбук повикаа на средби активисти за заштита на животните, за да ги слушнат нивните барања и решенија.
Една од активистките која зборуваше на отворениот јавен настан беше Гизела Бошковска Георгиевска – Анима Мунди, која инаку е на 11 место на советничката листа на ЗХГ.
КАНДИДАТУРА ДО ДИК
Вкупно 297 кандидати ќе се борат на претстојните локални избори на 17 октомври за градоначалници во 80 општини и Град Скопје, а поднесени се и 546 листи за советници, покажуваат резултатите од списокот што денеска го објави Државната изборна комисија (ДИК). Листите на пријавени на кандидати во општинските изборни комисии што ги испрати ДИК се без имиња, туку само со подносителите на кандидатурите.
ФИНГЕРПРИНТ
Во Државната изборна комисија (ДИК) денеска пристигна серверот потребен за користење на системот со кој на претстојните локални избори гласачите ќе се идентификуваат со отпечатоци од прсти. Со серверот пристигнаа и 10 станици за полнење на терминалите со информации за гласачите и тој сега ќе биде подложен на тестирање.
РОКОВНИК
Сите поважни рокови до крајот на изборниот процес на едно место се собрани во роковникот што го објави и ЦИВИЛ. Роковникот содржи податоци за тоа кога најдоцна треба да се поднесуваат кандидатските листи, финансиските и други извештаи, кога се гласа, кои се роковите за објавување на резултатите од изборите и многу други фази, настани и активности во текот на изборниот процес.
МОНИТОРИНГ
ИЗБОРЕН МОНИТОРИНГ Во тек е повикот за краткорочни изборни набљудувачи на ЦИВИЛ. Заинтересираните можат да се пријавуваат по пат на едноставна онлајн апликација до 30 септември. На медиумската платформа на организацијата достапни се и одговори на најчесто поставуваните прашања. Во овој период се спроведува и долгорочен изборен мониторинг, кој беше интензивиран од 15 август.
ГРАЃАНСКА ПРИЈАВА ЦИВИЛ спроведува и долгорочен мониторинг на дезинформациите и говорот на омразата. Како и во низа други области, тоа се прави во блиска соработка со граѓанките и граѓаните. Меѓу другото, достапна е и Граѓанската пријава на која може да се пријавуваат случаи на дезинформации и говор на омраза, но и кршење на човековите права, корупција, дискриминација и низа други негативни појави во општеството.
ПРИЈАВА НА ИЗБОРНИ НЕРЕГУЛАРНОСТИ За време на изборниот процес, на располагање е и веб страницата Слободни избори со онлајн формулар за пријава на изборни нерегуларности.
ПОТСЕТНИК: ЦИВИЛ ГИ ПОВИКА СИТЕ ПОЛИТИЧКИ ПАРТИИ И НЕЗАВИСНИ КАНДИДАТИ ДА ЈА ИСПРАЌААТ ИНФОРМАЦИИ ЗА АКТИВНОСТИТЕ
Во рамките на својот долгорочен изборен мониторинг, ЦИВИЛ и Редакцијата при медиумската платформа, редовно ги бележат настаните на различните учесници во изборната трка. Организацијата неодамна ги повика политичките партии и независните кандидати редовно да ја известуваат организацијата и нејзината медиумска платформа за своите активности. Дел од учесниците во изборната трка сè уште не одговорија на повикот.
Д. Муратов
