Продолжуваат партиските препукувања околу оставката на Венко Филипче. Но, покрај препукувањата за трагедијата во Тетово, политичките партии се обвинуваат за ширење на лажни вести поврзани со „нон-пејперот“ за македонско-бугарскиот спор.
Алијанса за Албанците се откажа од општините Кичево и Чашка за да не ги расцепкаат гласовите на Албанците.
ДУИ на овие локални избори ќе има повеќе жени, млади и лица кои доаѓаат од граѓанскиот сектор.
ПРЕПУКУВАЊЕ ЗА ФАМОЗНИОТ „НОН-ПЕЈПЕР“
Од СДСМ велат дека секогаш кога се наближува изборно соочување со граѓаните, така се зголемува интензитетот на лажни вести, конструкции и измислици од страна на опозицијата.
„Очигледно е дека фамозниот нон-пејпер е пишуван во штабот на ВМРО-ДПМНЕ, за да може Димитар Апасиев да шири лажни вести и да се радува на Фејсбук и другите социјални мрежи.
Што друго може да се очекува од политички партии кои наместо конкретни мерки и програми, нудат само лажни вести и невистини. Водењето држава и општини е посложено од пишување статуси на Фејсбук и тоа граѓаните одлично го разбираат и затоа одново ќе го казнат нечесното и неодговорно дејствување“, велат од СДСМ.
Од ВМРО-ДПМНЕ велат дека СДСМ со лажни вести се обидува да ја дефокусира јавноста од одговорноста на Филипче за трагедијата во Тетово.
„СДСМ ја разбира политика сакајќи да одвлече внимание од оставките и моралната одговорност на Венко Филипче и Зоран Заев за несреќата во Тетово. СДСМ да го провери лап топот на Заев и нека се увери кој е авторот на документот“, велат од ВМРО-ДПМНЕ.
ТРАГЕДИЈАТА ВО ТЕТОВО И ДЕНЕС СЕ НАЈДЕ НА ПАРТИСКИТЕ АГЕНДИ
„Денес Собранието на чело со Талат Џафери и мнозинството на СДСМ и ДУИ застана во целосна одбрана на Зоран Заев и Венко Филипче“, велат од ВМРО-ДПМНЕ.
Од СДСМ одговорија дека додека опозицијата тера бесрамна политизација на несреќата во Тетово.
„ВМРО-ДПМНЕ и Христијан Мицкоски покажуваат дека не го знаат Уставот, не го познаваат деловникот, дека немаат П од право и политика. По којзнае кој пат ВМРО-ДПМНЕ и Мицкоски се обидуваат да спечалат некој политички поен на национална трагедија, со што само го покажуваат нивното некрофилско, бесрамно лице“, велат од СДСМ.
ПАРТИСКИ КАЛКУЛАЦИИ
Алијансата за Албанците и Алтернатива, одлучи да се повлече од трката во општините каде што гласот на Албанците е поделен.
„Земајќи ги предвид специфичните околности на општина Кичево, одлучивме да го повлечеме нашиот кандидат од трката во оваа општина. Исто така, гледајќи ја можноста општината Чашка за првпат да ја води Албанец, ние како коалиција одлучивме да не се натпреваруваме со кандидат во Чашка и да го поддржиме единствениот кандидат Албанец, иако тој доаѓа од редовите на нашата политички противници“, велат од Алијансата за Албанците и Алтернатива.
Oд Демократската унија на Албанците на прес-конференција истакнаа дека на овие избори им се даде повеќе простор на жените, младите и лица кои доаѓаат од граѓанскиот сектор.
РОКОВНИК
Сите поважни рокови до крајот на изборниот процес на едно место се собрани во роковникот што го објави и ЦИВИЛ. Роковникот содржи податоци за тоа кога најдоцна треба да се поднесуваат кандидатските листи, финансиските и други извештаи, кога се гласа, кои се роковите за објавување на резултатите од изборите и многу други фази, настани и активности во текот на изборниот процес.
МОНИТОРИНГ
ИЗБОРЕН МОНИТОРИНГ Во тек е повикот за краткорочни изборни набљудувачи на ЦИВИЛ. Заинтересираните можат да се пријавуваат по пат на едноставна онлајн апликација до 30 септември. На медиумската платформа на организацијата достапни се и одговори на најчесто поставуваните прашања. Во овој период се спроведува и долгорочен изборен мониторинг, кој беше интензивиран од 15 август.
ГРАЃАНСКА ПРИЈАВА ЦИВИЛ спроведува и долгорочен мониторинг на дезинформациите и говорот на омразата. Како и во низа други области, тоа се прави во блиска соработка со граѓанките и граѓаните. Меѓу другото, достапна е и Граѓанската пријава на која може да се пријавуваат случаи на дезинформации и говор на омраза, но и кршење на човековите права, корупција, дискриминација и низа други негативни појави во општеството.
ПРИЈАВА НА ИЗБОРНИ НЕРЕГУЛАРНОСТИ За време на изборниот процес, на располагање е и веб страницата Слободни избори со онлајн формулар за пријава на изборни нерегуларности.
ПОТСЕТНИК: ЦИВИЛ ГИ ПОВИКА СИТЕ ПОЛИТИЧКИ ПАРТИИ И НЕЗАВИСНИ КАНДИДАТИ ДА ЈА ИСПРАЌААТ ИНФОРМАЦИИ ЗА АКТИВНОСТИТЕ
Во рамките на својот долгорочен изборен мониторинг, ЦИВИЛ и Редакцијата при медиумската платформа, редовно ги бележат настаните на различните учесници во изборната трка. Организацијата неодамна ги повика политичките партии и независните кандидати редовно да ја известуваат организацијата и нејзината медиумска платформа за своите активности. Дел од учесниците во изборната трка сè уште не одговорија на повикот.
Д. Муратов
