ВЕСТ НА ДЕНОТ
Во Велика Британија денеска почнува самитот на групата седум најразвиени земји (Г-7). Британскиот премиер Борис Џонсон очекува групата Г7 да донира милијарда дози вакцина против Ковид-19 на посиромашните земји за време на самитот. На самитот ќе учествува и американскиот претседател Џозеф Бајден, кој е во посета на Велика Британија. Самитот на Г-7 ќе трае до 13 јуни.
Американскиот претседател Џо Бајден го започна првото прекуокеанско патување во средата, со пристигнувањето во Велика Британија, во пресрет на Г7. „Соединетите држави се вратија“ – е изјавата што ги направи насловните страници и ударните вести во медиумите ширум светот. Тој не го изостави ни Путин. „Доаѓам на Г7, потоа во НАТО, а потоа ќе се сретнам со господин Путин и да му дадам до знаење тоа што јас сакам тој да го знае“, изјави Бајден пред американските војници стационирани во базата во близина на Лондон.
ИЗЈАВА НА ДЕНОТ
Портпаролот на американскиот Стејт департмент Нед Прајс, објави дека САД поддржуваат отворање преговори за членство во ЕУ со Северна Македонија и Албанија, без одложување.
We support the opening of EU accession negotiations with North Macedonia and Albania without delay. We are engaging at the highest levels of government to demonstrate our commitment to the aspirants' European paths.
— Matthew Miller (@StateDeptSpox) June 10, 2021
„Поддржуваме отворање преговори за членство во ЕУ со Северна Македонија и Албанија без одложување. Се ангажираме на највисоки нивоа во Владата, за да ја демонстрираме нашата посветеност кон европскиот пат на земјите аспиранти,“ напиша Прајс на Твитер.
ЦИВИЛ ВО ЖИВО
Гротеската на „воините“ против Вашингтон и Брисел
Јутуб верзија од денешното издание на ЦИВИЛ во живо во кое се коментираат ставовите од снимките за кои се верува дека се од Јелена Жугиќ, одењето во „војна“ против Брисел и Вашингтон и протестите „двајца без тројца“ кај нас, како и за младите и европските вредности.
ИНТЕРВЈУ
Разговаравме со Националниот координатор за интеркултурализам, едно општество, развој на културата и меѓуресорска соработка, Роберт Алаѓозовски, за Стратегијата „Едно општество за сите“. Тоа е исклучително важна Стратегија, која во себе обединува низа компоненти и се однесува на многу нивоа за општеството и на институциите на државата. Според негови зборови, тоа е приоритетна владина стратегија. Во ова интервју дознаваме дали и на кој начин се имплементира и кои се предизвиците пред кои е исправена владата во поглед на оваа Стратегија.
Стратегијата „Едно општество за сите“ е значајна за развојот на нашата демократија, на општеството, но и на државата во целост. Стратегијата има влијание и во низа други области, на постоењето и на развојот на државата, има свои импликации во односите меѓу заедниците во секоја смисла на зборот. Значајна е и за економскиот развој на државата, но исто така има импликации и врз стабилноста и безбедноста на земјата.
ЦИВИЛНИ АКТИВНОСТИ
ЦИВИЛ организира јавен настан на тема „Автопатот со факти, одговорност и решителност наспроти беспаќето на опасните дезинформации“ во среда, 16 јуни, во хотел Сити Парк (кај општина Центар), со почеток во 11 часот. Настанот ќе трае 60 минути.
Дали дезинформациите и говорот на омразата претставуваат хибридни закани? Дали институциите имаат капацитет за справување со хибридните закани? Колку и на кој начин можат граѓанските организации и медиумите да се вклучат во заштитата од хибридните закани? Со факти, одговорност и решителност наспроти опасните дезинформации… Тоа се дел од прашањата и темите за кои ќе стане збор на јавниот настан на ЦИВИЛ.
НАЈАВА: Јавен настан на ЦИВИЛ „Колку сме еднакви?“
ЦИВИЛ организира јавен настан (панел дискусија) на тема „Колку сме еднакви?“ посветен на политиките и практиките за еднаквост, недискриминација и промовирање на европски вредности во единиците на локалната самоуправа на 17 јуни, (четврток), во хотел Сити Парк, со почеток во 13 часот. Настанот трае 45 до 60 минути.
Главното прашање на панел дискусијата се однесува на капацитетите, можностите, политиките и практиките на локално ниво во промовирањето на европските вредности, а во тие рамки и еднаквоста, недискриминацијата на локално ниво.
ФЛЕШ ВЕСТИ
ПРИТВОР Кривичниот совет при Основниот кривичен суд Скопје, донесе решение со кое ја продолжи за 30 дена мерката притвор за Јордан Камчев.
ДВОЈНИК Обвинетите во случајот „Двојник” осудени на вкупно 16 години затвор
МАТУРА Матурантите денеска го полагаа вториот екстерен испит за кој можеа да избираат меѓу предметите математика, странски јазик, филозофија и естетика.
ТРАНСПЛАНТАЦИЈА Извршена е уште една успешна трансплантација на срце, која е четврта во земјава од минатиот мај.
САМИТ НА ЕУ Во пресрет на Советот на министри и Самитот на ЕУ, од Париз францускиот претседател Емануел Макрон порача дека Северна Македонија заслужува да ги почне преговорите за членство во Унијата без одложување.
ФИЛМ Филмови за Кирил Џајковски и The Hip ќе се прикажат на фестивалот „Докенритам“ во Белград.
КОВИД-19 Епидемиолошката слика во земјава е добра и нема простор за загрижување кај граѓаните и воедно дека нема ризик за организирање на семејни прослави и културни настани во текот на ова лето. Вчера се аплицирани 10.065 вакцини.
ЗАГРОЗЕН ВИД Репрогласувањето на НП Маврово е клучно за опстанокот на балканскиот рис.
Г-7 Во Велика Британија денеска почнува самитот на групата седум најразвиени земји (Г-7).
АТИНА ЗА ДЕКРЕТОТ НА БАЈДЕН: Грција ја поддржува европерспективата на Западен Балкан.
СТРАЗБУР Државата денеска ќе испрати одговор на 60 страници до судот во Стразбур за помилувањата од поранешниот претседател Иванов.
СЛОБОДНА ЗОНА
„Младите знаат! Општеството е поларизирано, а деструктивните и антизападни структури сè уште се присутни и моќни, за да можеме да здивнеме сите заедно, а најмногу младите. Долг е патот пред нас, преполн со предизвици. Европските вредности не се недостижни, тие се вткаени во мислите и однесувањето на младите. Европската иднина е веќе во нивните раце, но има премногу грабливи погледи кои сакаат да им ја одземат. Меѓу нив се луѓе од мојата генерација, но и многу нивни врсници, тотално отруени од моите врсници“, пишува Џабир Дерала во „Младите знаат!“
Ирена Крџиќ
