К. Ѓ. и неговиот татко Ц. Ѓ. изутринава околу 6 часот се приведени од нивниот дом во полициската станица во скопската населба Кисела Вода, поради напад врз пратеникот Зијадин Села, лидерот на ДР на ДПА, во Собранието на „црниот четврток“, 27 април, соопшти МВР. Таткото и синот којшто убаво се гледа на снимките како го влече пратеникот Села, се товарат за сторено кривично дело „учество во толпа, што ќе изврши кривично дело“.
При претресот во нивниот дом, со наредба од судија на претходна постапка, се пронајдени и одземени патики со видливи траги од крв, облека и три мобилни телефони.
„При преземањето на мерките и активностите, било утврдено дека во салата 3, каде се одржувала прес- конференција, Ц. Ѓ. најпрвин фрлил стол, а К. Ѓ. фрлал разни предмети кон присутните пратеници, по што двајцата заедно физички го нападнале и го влечеле пратеникот З. С.“, соопшти МВР.
Пред тоа, во полицијата дал изјава Т. Т., еден од четворицата кои го влечеа Села по собраниските ходници.
Скопјанецот И. К. се сомничи за напад врз лидерот на СДСМ, Зоран Заев и затоа што фрлил столче кон собраниското обезбедување. По информативниот разговор, И. К. е ослободен. МВР против него најави кривична пријава поради основано сомневање дека сторил кривично дело „учество во толпа што ќе спречи службено лице во вршење на службено дејство“.
На 27 април 2017. откако парламентарното мнозинство го изгласа новиот собраниски спикер, ексминистерот за одбрана Талат Џафери, пратеник од ДУИ, маса граѓани, демонстранти од иницијативата „За заедничка Македонија“, насилно влегоа во Собранието. Дел од граѓаните нападнаа и повредија пратеници и новинари, при што, на лидерот на СДСМ, Зоран Заев и на пратеникот Зијадин Села им се нанесени најтешки телесни повреди. Села 10 дена гпомина на рехабилитација во приватна клиника во Тетово.
М. Талеска
