пишува: ЏАБИР ДЕРАЛА
Пред да ја разгледува опцијата за продолжување на вонредната состојба, Советот за безбедност на средбата кај претседателот Пендаровски треба да ја разгледа безбедносната состојба во земјата што произлегува и од неодговорното и незрело однесување на дел од политичките структури во земјава. Пред сѐ, на јавноста ѝ е потребна оценка на безбедносната состојба во земјава поради непостапувањето на полицијата во ситуации во кои е сосема јасно дека мора да постапува, за да го заштити јавното здравје. Вистинските размери и последиците од инертноста и политичката злоупотреба на полицијата, допрва ќе се почувствуваат и тоа во период кога на земјава најмалку ќе ѝ биде потребно тоа.
Навистина, еден министер, па нека е и Чулев, не смее да си дозволи изјава дека „тој не сака да ги казнува граѓаните“. Премногу е наивно популистичка и истовремено опасна. Кој ќе ја лапне таа јадица, мора да е сом, коментираше еден мој другар. Не мора да се биде којзнае колку информиран и свесен за да се заклучи дека никој не бара од него да казнува. Тоа беше работа на една негова сопартијка и претходничка во истиот ресор, кога казнувањето и репресијата беа начин да се одржува режимот и да се спроведуваат изборни кражби. Задача на еден министер за внатрешни работи е да го спроведува законот, да им служи и да ги заштитува граѓанките и граѓаните. Во случајот со Чулев, тој е министер во преодна влада чија основна задача е да обезбеди слободни избори. Ништо повеќе!
Во секој случај, било да е во преоден или редовен владин состав, обврска на министерот за внатрешни работи е да се грижи за безбедноста на граѓанките и граѓаните. Тоа му е работата. Како што тоа го прават лекарите кога некој е болен. Како што пожарникарите го гасат пожарот кога гори куќа.
Еве да биде полесно за разбирање… Изјавата на „добриот полицаец“ Чулев е исто како сообраќајниот полицаец да каже дека не сака да го казни возачот што прегазил човек на пешачки премин! Таквиот став би значел крајно неодговорно однесување за кое следи отказ од работно место и строга казна. Нека е и технички министер на МВРО во прашање, но неговата изјава е директно признание дека тој не ја извршува својата и ја оневозможува основната функција на полицијата – безбедноста.
Советот за безбедност и Претседателот, професорот Пендаровски, сигурно ќе се сетат да ги разгледаат последиците од ваквата изјава. Понатаму, Советот за безбедност сигурно ќе ја земе предвид безбедносната состојба на земјата доколку прогласат продолжување на вонредната состојба. Како токму продолжување на вонредната состојба ќе се одрази на демократијата и на функционалноста на институциите, а секако и врз безбедноста во земјата? И тоа прашање е важно, освен реакцијата која на многумина им се чини логична во овој момент – продолжување на вонредната состојба.
Продолжување на вонредната состојба може да биде неизбежна одлука. Но таа ќе значи и продолжување на лимбо ситуација, без демократски институции, со техничка влада во која има ликови што ги загрозуваат демократијата, владеењето на правото, човековите права и безбедноста. Но поважно од вонредна состојба во моментов е да се организираат избори за да се спаси државата од министри како Наќе.
Имаме техничка влада за спроведување избори, во која министерот за здравство јавно го опоменува министерот за внатрешни работи дека не си ја врши работата, со што нему и на здравствените работници им отвора уште повеќе работа. Наспроти тоа, „добриот полицаец“ не гледа подалеку од „отсјајот“ на ракавиците на полициски службеници со високи чинови што му се ентураж на неговиот партиски лидер. Имаме влада во која министрите требаше да спроведат изборен процес за 100 дена, а биднаа 148 дена до сега (30 мај).
Имаме влада од преоден, изборен карактер, а беше ставена во ситуација да се бори со коронавирусот, но и со инфодемијата чиј генератор се МВРО и нивните куртон медиуми. Тоа е влада во која едни го штитат јавното здравје и продолжија со ЕУ и НАТО агендата, а други водат црна партиска кампања со злоупотреба на службената положба и јавните ресурси. Ова е влада без неопходната демократска контрола од парламент. Нешто што им одговара само на антизападните и антидемократските структури, чија главна преокупација се парите и бегството од правдата.
Верувам дека и Претседателот и Советот за безбедност веќе знаат дека, ако треба да има продолжување на вонредната состојба, мора да се преземат мерки таа повеќе да не биде чадор за опасни безбедносни игри и загрозување на јавното здравје.
Сите права се задржани. Услови за користење, авторски права и заштита на приватноста.
