По министерот за внатрешни работи, Панче Тошковски, и директорот на Центарот за управување со кризи (ЦУК), Стојанче Ангелов, кои на вечерната прес конференција на 13 септември тврдеа дека пожарот во депонијата за електронски отпад во Трубарево, скопско, претставува „хибриден напад“, се огласи и премиерот Христијан Мицкоски. Тошковски не може ни Господ да го убеди дека се работи за случајност, а за Ангелов, сите пожари се хибриден напад. За Мицкоски, пак, се работи за хибриден напад против неговата влада.
Анализата на случајот под наслов Манипулативна злоупотреба на поимот „хибридни напади“: Кога државата си измислува непријатели секако дека може во целост да се примени и на изјавата од премиерот.
Во врска со изјавите на првите луѓе на МВР, ДЗС и Владата, имавме преписка со проф. д-р Оливер Андонов, чија богата кариера е поврзана со безбедноста и сигурноста и од воен и од полициски аспект.
Според Андонов, ова што ни се случува со депониите може да е ДИВЕРЗИЈА, но тоа е дел од специјална војна како дефиниција на специјалната војна во рамките на војувањето. Може да се зборува и за хибриден напад, но тоа е исто дел од поранешниот термин специјална војна.
„Во однос на пресот на Панче и Стојанче, а на тоа се надоврза и изјавата на Мицкоски дека се работи за хибриден напад од центри од надвор и од внатре, станува јасно дека Мицкоски, Панче и Стојанче не знаат што е тоа Хибридна војна и во современ аспект што тоа значи и кон што е насочена. Вам ви е јасно дека хибридните дејства се насочени кон држави кои се сериозна закана или пречка, а Македонија тоа не е. Иако Мицкоски во неговата изјава рече дека хибридниот напад бил против оваа влада и тоа му беше во стилот на Вучиќ“, изјави проф. Андонов во преписката со ЦИВИЛ Медиа.
Тој пишува дека се работи за неспроведување на законите и превентивните мерки.
„Во конкретниот случај со депониите или поточно ѓубриштата, се работи за неработење, неспроведување на законите, непостоење превентивни мерки за Противпожарна заштита за селекција на отпад и управување со отпад, па дел од ѓубриштата се палат самите поради загревање на метанот како производ од распад на сметот, а дел (како она вчера во Трубарево) поради нестручно управување со високо ризичен отпад и без надзор од државата“, изјави Андонов во преписката со ЦИВИЛ Медиа.
Според нашиот соговорник, сево ова е обид власта да се спаси од „несомнената одговорност“ за овие појави што ја алармираат јавноста и го загрозуваат здравјето и безбедноста на населението.
„Целиот обид на Мицкоски и останатите е да се спаси од несомнената одговорност на државата за загадувањето, пожарите и воопшто неспособноста за нормално функционирање на државата и спроведување на законите. Затоа, смислиле да зборуваат за хибридни напади без да посочи кој стои зад нив, а би било логично да се знае кој стои зад нив и да се делува“, категоричен е Андонов.
Тој, исто така, потенцира дека ако се работи за хибридни напади – иако лично не верува во тоа – се поставува прашањето зошто владата не презела мерки за отпорност и одбрана од хибридни напади.
„Но и да му веруваме дека се хибридни напади (во што воопшто не верувам), тогаш се поставува повторно прашањето за улогата на владата и зошто не презела мерки за подготовка на државата и особено населението за отпорност и одбрана од хибридни напади“, тврди нашиот соговорник за ЦИВИЛ Медиа.
Според проф. Андонов, Мицкоски се служи со пропаганда и ништо повеќе, со цел да ги спаси своите позиции во пресрет на изборите. Тој потсети дека во ексклузивниот текст за ЦИВИЛ Медиа посветен на хибридното војување го изнесе тврдењето дека „оваа влада ја направи земјава прокси држава за руски хибридни закани кон НАТО и ЕУ“.
„Политикантските коментари дека се работи за хибридни напади против неговата влада не се ништо освен пропаганда заради негов спас на изборите. Инаку, претходно напишав за ЦИВИЛ Медиа дека оваа влада ја направи земјава прокси држава за руски хибридни закани кон НАТО и ЕУ“, заклучува проф. Андонов во преписката со ЦИВИЛ Медиа.
Во текот на денот, ЦИВИЛ го покани проф. Андонов на видео интервју во кое стана збор за низа актуелни теми поврзани со политиката, безбедноста и геополитичките процеси.
РЦМ
