Илјадници луѓе излегоа денеска на улиците ширум светот за да го осудат насилството врз жените на Меѓународниот ден за спречување на насилство врз жените, прогласен од ОН, објавија западните медиуми.
„Родовото насилство продолжува да им нанесува болка и неправда на многумина. Се проценува дека една од три жени на глобално ниво доживува физичко насилство, силување или следење во одреден момент од нивниот живот. Тоа е недозволиво“, изјави американскиот претседател Џо Бајден.
Според него, често во областите на конфликт „безброј жени и девојки страдаат од рацете на сторителите кои вршат родово насилство и силуваат, користејќи ги како оружје за војна. Знаеме што е во прашање: секогаш и секаде каде што жените и девојките се под закана, исто така под закана е и мирот и стабилноста“.
Демонстрантите синоќа во Гватемала започнаа комеморации, запалија свеќи за да го означат бројот 438 – што е број на убиени жени досега оваа година.
Во Италија, која е потресена од убиството на 22-годишна студентка, наводно од нејзиното поранешно момче, околу 50.000 луѓе протестираа во Рим, каде Колосеумот треба денеска да биде осветлен во црвено. Земјата е згрозена од случајот со Џулија Чекетин, која исчезнала една недела додека требало да добие диплома по биомедицински инженеринг од Универзитетот во Падова. Нејзиното тело на крајот беше пронајдено на околу 120 километри северно од Венеција, а нејзиното поранешно момче, 22-годишниот Филипо Турета е уапсен во Германија.
До 12 ноември имало 102 случаја на убиства на жени во Италија, од кои 82 биле убиени од членови на семејството или сегашни или поранешни партнери, соопшти Министерството за внатрешни работи.
Во Чиле, луѓето маршираа во Сантијаго, носејќи портрети на жртвите.
Во Турција околу 500 жени се собраа во квартот Шишли во Истанбул, носејќи транспаренти на кои пишуваше „Нема да молчиме“ и „Жените се обединети и се борат против насилството од машката држава“, опколени од полициските единици за борба против нереди. Демонстранти излегоа и на улиците во Анкара.
Неколку илјади луѓе маршираа низ улиците на Париз и други француски градови, носејќи транспаренти на кои пишуваше: „Едно силување на секои шест минути во Франција“ и „Заштитете ги вашите девојки, едуцирајте ги вашите момчиња“.
Според владините податоци, Франција оваа година има регистрирано 121 злоставувана жена, споредено со 118 во 2022 година.
Г. Т.
