Филмските работници од Македонија денеска протестираа пред Министерството за култура. Тие реагираат на одлуката на Министерството за кратење на буџетските средства за филмската дејност во предлог-буџетот за 2018 година.
Педесетина филмски работници застанаа зад писмото што го прочитаа пред Министерството, во кое најавија дека македонскиот филм за 2018 ќе добие четири отсто помалку средства од лани.
„Со ова писмо, ние, филмските професионалци од Македонија, независни филмски автори и продуценти и слободни филмски работници го изразуваме нашиот револт кон одлуката на Министерството за култура во предлог-буџетот за 2018 година да направи кратење на средствата наменети за филм, и тоа во времето кога во целиот свет, а особено во Европската Унија, буџетите за филм постојано се зголемуваат. Нашата филмска продукција е во развој. Ние сме свесни дека и меѓу нас има дела кои се промашувања, како и заталкани поединци и профитери, особено во последните десет години, но има и автори, кои се претставуваат на најпрестижните филмски фестивали. Кратењето на средствата за филм во време кога државниот буџет се зголемува е директен удар за нашата, и онака кревка филмска продукција. Аргументите дека и со помалку пари се прават добри филмови се точни, но како исклучок. Аргументите дека пари се давале, а се правеле лоши филмови се исто така точни, но важат за други времиња, кога тие се даваа со политичка одлука, а токму против тоа голем дел од нас се бореа. Затоа, најљубезно ве молиме и од вас очекуваме да ја преиспитате оваа одлука“, стои во писмото на филмските работници.
На крајот присутните побараа средба на нивни претставници, претставници на агенцијата за филм, министерот за култура и сите релевантни политички чинители за наоѓање на „заеднички јазик за доброто на македонскиот филм“.
На присутните им се придружи советникот од Минстерството за култура, Петрит Сарачини, кој го поздрави протестот.
„Не сме на различни страни. Навистина ми е мило што по долги години молк се случи еден ваков протест. Вашите желби се заеднички и Министерството ќе ве поддржи во вашите барања за достоинствена работа“, одговори Сарачини.
Од Министерството потврдија средба со филмските работници, која ќе се одржи во понеделник, а во меѓувреме испратија и соопштение во јавноста.
„Средствата одвоени за Агенцијата и за филмската дејност се проектирани за да ги задоволат потребите на филмските работници во земјата. Вистина е дека годинава Агенцијата доби помалку средства од претходната, но исто така треба да имаме предвид дека токму преку буџетот на Агенцијата во минатото се реализираа проекти и дела кои спроведуваа партиска и политичка пропаганда, а не уметнички дела, како и дека преку нив се прекршуваа законите и се правеа злоупотреби“, стои во соопштението.
Од Министерството информираат дека се подготвени доколку добијат квалитетни проекти да најдат средства и преку пренамена, како и преку ребаланс на буџетот да ги помогнат и поддржат истите.
„Наша намера не е да се одделат средства и тие да лежат непродуктивно на сметки на институциите, туку да се трошат според бараната динамика на проекти кои се во интерес на граѓаните. Доколку филмските работници предложат и донесат такви проекти, ние со задоволство ќе ги поддржиме и подготвени сме во таа смисла и да го зголемиме буџетот“, се вели во соопштението.
М.И.
