Првата дама на Украина, Олена Зеленска, на својата Фејсбук страница објави отворено писмо за тоа што ѝ се случи на Украина во последните две недели од руската инвазија.
„И покрај уверувањата од пропагандните места поддржани од Кремљ, кои ова го нарекуваат специјална операција, тоа е, всушност, масовно убиство на украински цивили“, напиша Зеленска.
Во долгото и емотивно писмо, таа додаде: „Најстрашно и најпогубно од сѐ во оваа инвазија се децата жртви. Осумгодишната Алис која почина на улиците на Охтирка додека нејзиниот дедо се обидуваше да ја заштити. Или Полина од Киев, која загинала во гранатирањето со нејзините родители. 14-годишниот Арсениј бил погодена од урнатини во главата и не можела да се спаси бидејќи брзата помош не можела навреме да стигне до него поради интензивните пожари.“
Зеленска напиша и за децата родени во првите денови од војната.
„Првото новороденче од војната, го виде бетонскиот таван од подрумот, првиот здив им беше лутиот воздух на подземјето и ги пречека заедница затекната во скривници и тероризирана. Во овој момент има неколку десетици деца кои не знаат за мир во нивните животи“, напиша таа.
Украинската прва дама пишува и за предизвиците за добивање основна медицинска нега, како и за растечкиот бран бегалци. Рече и дека рускиот претседател Владимир Путин го потцени отпорот на Украинците.
„Додека пропагандистите од Кремљ се фалеа дека Украинците ќе ги пречекаат со цвеќиња како спасители, тие беа пречекани со молотови коктели“, напиша таа.
Зеленска, исто така, им се заблагодари на луѓето од целиот свет за поддршката на нејзината земја, но ги повтори и барањата на нејзиниот сопруг за зона на забранети летови над Украина.
„Затворете го небото, а ние самите ќе управуваме со војната на теренот“, рече таа.
Војната не е „некаде таму“, туку во Европа, пишува Зеленска.
„Сведочам и му кажувам на светот: војната во Украина не е војна некаде таму. Ова е војна во Европа, блиску до границите на ЕУ. Украина ја запира силата што утре може агресивно да влезе во вашите градови под изговор за спасување цивили“, напиша таа.
Зеленска, на крајот од своето емотивно обраќање до светот, напиша:
„Ако не го спречиме Путин, кој се заканува дека ќе започне нуклеарна војна, нема да има безбедно место во светот за никој од нас“, заклучи таа.
