Синдикатот на затворениот комбинат „Југохром“, утре од 11 до 13 часот ќе го блокира автопатот Скопје – Тетово. Од Синдикатот се незадоволни, бидејќи и покрај средбите со премиерот Димитриев, власта нема слух за решавање на ситуацијата.
Последниот Извештај за аерозагадувањето што го презентираше „Еко Герила“ покажа дека загадувањето на Тетово и Полог е многу намалено, по затворањето на „Југохром“, но Синдикатот не се согласува со овие тези.
Претседателот на Синдикатот на Југохром, Бајрам Амити на Фејсбук ги повика сите вработени и граѓаните на Тетово да им се придружат на синдикалците во заедничкиот протест.
Доколку Државниот инспекторат за животна средина повторно донесе одлука за забрана на работењето на Југохром, фабриката ќе почне со отпуштање на дел од вработените, најави директорот Васил Скендеровски, на денешната прес конференција. Скендеровски вели дека Инспекторатот нема ист статус кон сите расположливи производствени капацитети во Тетово и околината, како и дека не се издржани обвинувањата дека Југохром е најголемата причина за загадувањето на градот.
„Најодговорно тврдам дека загадувањето на Тетово воопшто не се намали и покрај неработењето на комбинатот“, потенцира директорот.
Забраната за работа на Југохром истекува утре.
