Договорот за стратешко партнерство меѓу владите на Република Македонија и на Обединетото Кралство, со кој земјава добива на располагање историски најголем обем на средства од пет милијарди фунти (шест милијарди евра) за реализација на капитални проекти, ќе биде потпишан денеска во Лондон.
ЦИВИЛ Медиа ги праша граѓан(к)ите што мислат за стратешкиот договор со Велика Британија?
Најголемиот дел од одговорите е дека ова е очајнички потег од власта – доказ за безизлезноста во која се наоѓаме. Нема ЕУ преговори, нема фондови, нема грантови. Само долгови. И тоа скапи. Давеникот и за сламка се фаќа, ама ова не е сламка – ова е сидро што не влече уште подлабоко.
Подобро „страшниот“ отколку „стратешкиот“!
Долгови до гуша – за неполна година. Ако вака изгледа почетокот, што нè чека до крајот на мандатот? Ова не е „стратешки договор“ – ова е отворено признание дека станавме економска колонија.
Граѓаните додаваат дека нè задолжија повеќе од годишниот буџет на Македонија, а долгот ќе го враќаат генерации што уште не се ни родени. Како народ, добивме чувство како да сме зеле кредит од приватна лихварска штедилница – нема јасни услови, нема референдум, а сега ќе „играме како што тие ќе ни кажат“.
„Иронијата е страшна – нас не нарекуваат „стратешки партнер“, а всушност сме стратегија на нечиј профит. Додека англиските „партнери“ даваат еден, ќе земаат три – преку нивни фирми, услови, и секако – политичко влијание. Да не зборуваме што покрај кредитот, како „бонус“, ни следуваат и мигранти. Уште не знаеме со која камата ќе го плаќаме долгот, ама знаеме кој ќе го чувствува товарот – секој обичен граѓанин“, велат граѓаните.
Ова не е стратешки потег, ова е национално самопонижување
Прашање е само кога ќе следува и девалвација на денарот – економски, ова веќе нема логика. А логиката на долгови, камати и странски изведувачи нè носи право во зависност, беда и уште поголема недоверба.
„Тешко на Англичаните ако ние сме им стратешки партнер… А тешко и нам, ако оваа стратегија ја прифатиме како нормална“!, велат граѓаните.
Премиерот Христијан Мицкоски денеска нагласи дека Договорот за стратешко партнерство со Обединетото Кралство, јавно и транспарентно ќе биде презентиран во македонското Собрание, и ги отфрли шпекулациите дека со договорот во земјава предвиден е и прием на мигранти – „Бидете спокојни, таква работа кај нас ќе нема“.
– Денеска се става параф на тој договор, потоа документот ќе дојде во парламентот пред пратениците. Ние шверцерски ништо не носиме, не злоупотребуваме европско знаме, ќе видат пратениците се што следи од тој проект, изградба на пруга што ќе ги поврзи Табановце со Гевгелија, реконструкција и модернизација на пругата, завршување на Клинички центар во Штип заедно со зграда за Медицински факултет и Студентски дом, изградба на болницата во Кичево заедно со здравствен дом и целосна реконструкција на Клиничка болница во Тетово. Тука не застануваме бидејќи имаме најмалку уште 60 проценти од рамката што ни е на располагање, посочи Мицкоски.
Д.М.
фото: ВИ
