Канал 103, на 24 ноември ќе го прослави својот 27 роденден, со музичкиот фестивал „103 генерации“, во Младинскиот Културен Центар.
Роденденот на Канал 103 ќе се прослави со целовечерен настан во МКЦ, на две сцени, со четири бендови и артисти од Велика Британија, Шведска, Албанија и Македонија, а фоајето на „Кино Фросина“ ќе биде резервирано за настап на диџеите на 103ка.
На главната сцена ќе настапат бендовите: The Oscillation, The Field, I TPAME I TVRAME и SUSIJAT, и диџеите: Виолета Качакова, Илина Ангеловска, Ивана Драгшиќ и Мирко Попов.
The Oscillation се повеќе процес отколку бенд во класична смисла на зборот или можеби најточно, збир од сонични излети на извонредниот музички ум на Demian Castellanos. Оформени се во Лондон во 2006 година и во различни постави до денес имаат издадено 6 албуми, сите со цврста аудио-визуелна доследност и идеолошка дисциплина во музичка смисла.
The Field е псевдонимот под кој настапува Axel Willner, шведски електронски музички мастермајнд кој живее и работи во Берлин.
I TPAME I TVRAME се дарк/минимал/колд вејв дуо од Тирана составено од Franc Kurti и Dina Hajrullahu. Постојат само две и пол години, а во јуни веќе го издадоа третиот по ред албум Ikin Vijnë LP.
SUSIJAT се четворка од Скопје. Деан Змејкоски, Тодор Караколев, Лазар Дарковски и Никола Дрвошанов се заедно од 2014 година, за наредната да го издадат нивниот првенец Safety in Numbness LP за Шарла.
Билетите се во продажба во Југотон Рекордс, МКЦ и на продажната мрежа на МК Тикетс по цена од 350 денари, а на денот на одржувањето на фестивалот билетите ќе чинат 500 денари.
А. Петровска
