ЦИВИЛ соопшти дека рокот за поднесување онлајн пријава за учество на семинарот „Транспарентност и одговорност во политичките процеси“ истекува во понеделник, 17 часот. Сепак, организаторите нагласуваат дека е подобро заинтересираните да се пријават што порано, бидејќи е можно бројот да биде пополнет пред истекот на рокот. Семинарот ќе се одржи на 14 и 15 август, во хотел „Романтик“, на брегот на Велешко Езеро.
Специјални гости на семинарот се првата антикорупционерка, Билјана Ивановска, експертот за финансии, до скоро советник на екс-министерот Тевдовски, активистот за човекови права, Бранимир Јовановиќ, како и градоначалникот на Велес, Аце Коцевски. Тие ќе говорат во сесии што се отворени за јавноста, но аудио и видео снимање нема да биде дозволено, со исклучок на сесијата во четврток, 15 август, со почеток во 13:30 часот.
Излагањата на специјалните гости на семинарот ќе бидат добра основа за понатамошни активности на граѓанските организации и градење меѓусекторски партнерства за постигнување на повисока транспарентност и одговорност во политичките процеси на локално и национално ниво.
Меѓу говорниците на сесиите отворени за јавноста ќе биде и Џабир Дерала, Претседател на ЦИВИЛ кој, заедно со членовите на проектните тимови на организацијата ќе одржи презентации со примери за злоупотреби на јавни ресурси и коруптивно однесување на политичките партии и нивните функционери, како и презентација на проектот „Граѓански објектив: Транспарентност и одговорност во политичките процеси“. На затворените сесии на семинарот, членовите на проектните тимови на организацијата ќе одржат работилници за стратешко планирање и едукација за различни аспекти на работењето на организацијата во овие чувствителни области.
Поканата за аплицирање и агендата на отворените сесии е достапна онлајн, а за оние што нема да успеат да аплицираат или ќе бидат одбиени поради просторните ограничувања, ќе имаат можност да проследат медиумски содржини на ЦИВИЛ Медиа во кои ќе бидат објавени пораките и информациите што говорниците ќе ги споделат на семинарот.
ЦИВИЛ Тим за комуникации
Формулар за пријава
Покана за аплицирање и агенда на отворените сесии на семинарот
Дополнителни информации побарајте на: civil@civil.org.mk или 02/5209 176 (секој работен ден, 9-17 ч.)
фотографија: Б. Јордановска/ЦИВИЛ (од настанот „Граѓан(к)ите за државата или државата за граѓан(к)ите, Градски Парк, 25 јуни 2019 г.)
ЦИВИЛ забрзано се подготвува за семинарот „Транспарентност и одговорност во политичките процеси“
