Романија, членка на НАТО, денеска отвори меѓународен центар за обука на пилоти од сојузничките земји за управување со борбени авиони Ф-16 (ЕФТЦ), кој ќе биде отворен за сите сојузници и партнери, вклучително и Украина за време на војната против Русија, пишува Кијив индепендент.
Романија има 650-километарска граница со Украина, а конфликтот таму се приближи откако Москва постојано ги напаѓаше украинските пристаништа преку реката Дунав.
Минатата година Букурешт одлучи да купи 32 користени борбени авиони Ф-16 од Норвешка, произведени од американската компанија Локхид Мартин, откако во 2016 година купи 17 од Португалија.
Исто така, Романија има намера да потроши 6,5 милијарди долари за купување на 32 нови авиони Ф-35 по 2030 година.
ЕФТЦ е отворен во базата на романските воздухопловни сили во близина на југоисточниот град Фетешти и користи авиони Ф-16 обезбедени од Холандија, додека поддршка за обука обезбедува Локхид Мартин и неговите партнери.
Центарот би можел да започне со обука на украински пилоти веќе следната година, изјави холандскиот полковник Оливие Бок. „Намерата е, исто така, да се обучуваат украински пилоти“, рече Бок, додавајќи дека романските власти сè уште немаат поставено временска рамка, но обуката би можела да започне „на почетокот на следната година“.
Во август, САД одобрија продажба на дански и холандски авиони Ф-16 на Украина за одбрана од руски напаѓачи откако ќе заврши обуката за пилоти. Украина активно бара Ф-16 за да се спротивстави на руската воздушна супериорност.
„Навистина ја гледам нивната потреба да набават авиони Ф-16“, рече Бок. Иако некои украински пилоти веќе се обучуваат во Данска и во САД, Бок рече дека Романија е „поблиску до нивната татковина и има горе-долу иста средина“.
Холандската министерка за одбрана Кајса Олонгрен, која присуствуваше на отворањето на центарот за обука, на прашањето дали Холандија ќе испрати авиони Ф-16 во Украина, рече дека тоа зависи од подготовките на украинската страна.
„Тие треба да имаат обучени пилоти, да имаат персонал за одржување, да имаат подготвена инфраструктура, а ние исто така мора да се координираме со нашиот партнер и со САД бидејќи се работи за американска опрема“, рече таа.
Г. Т.