Руската православна пропаганда сè почесто наоѓа простор во јавниот дискурс во Северна Македонија преку медиуми поврзани со Македонската православна црква – Охридска архиепископија (МПЦ-ОА), покажува анализата објавена на платформата Antidisinfo.net. Според истражувањето, одредени црковни портали, пред сè Liturgija.mk, редовно пренесуваат содржини што ја прикажуваат Руската православна црква (РПЦ) и руската држава во позитивно светло, без критички осврт.
Во текстовите се застапени наративи кои се совпаѓаат со официјалната линија на Москва, особено во однос на војната во Украина, при што Русија се прикажува како „заштитник на Православието“, а Западот како закана за традиционалните и духовните вредности. Аналитичарите предупредуваат дека ваквиот пристап има потенцијал да влијае врз јавното мислење и да придонесе кон релативизирање на руската агресија врз Украина.
Во анализата се посочува дека ваквите тенденции станале поизразени по признавањето на автокефалноста на МПЦ-ОА, кога комуникацијата со Руската православна црква се интензивирала. Токму овој момент, според авторите, создал „влезна точка“ за ширење пропагандни пораки преку црковни канали, кои традиционално уживаат високо ниво на доверба кај верниците.
„Многу од актуелните про-руски коментари на хиерархијата на МПЦ-ОА не беа забележливи пред две или три години. Црквата се користи за ширење пропаганда што позитивно ја афирмира Руската православна црква и руската држава во Македонија“, се наведува во анализата.
Истражувањето предупредува дека ваквото медиумско дејствување не е изолиран феномен, туку дел од поширока стратегија на руско влијание на Балканот, каде религијата се користи како инструмент за политички и геополитички цели. „Целта е да се убеди јавноста дека Русија ќе го спаси Православието од ‘злиот’ Запад и да се промовираат руски вредности“, се вели во текстот.
„Целта е да се убеди јавноста дека Русија ‘ќе го спаси Православието од ‘злиот’ Запад’ и да се промовираат руски вредности,“ се вели во анализата.
Заклучокот е дека е неопходна поголема медиумска писменост, како и критички однос кон содржините што доаѓаат од извори со силна идеолошка и политичка агенда, без оглед на нивниот религиозен контекст.
М. Д.
Целата статија првично е објавена од Truthmeter.mk (Северна Македонија), во рамките на проектот за борба против дезинформациите во Западен Балкан.
