Руската амбасада во Северна Македонија, на 6 ноември, на Твитер сподели мурал од Северна Митровица на кој пишува „Косово е Србија – Крим е Русија“.
„Напомена, Русија е плус Луганск, Доњецк, Запорожје и Керсон“, е провокацијата на руската дипломатија објавена на Твитер.
Објавата на Твитер на Руската амбасада во Република Северна Македонија има околу 300 споделувања, речиси 2.000 допаѓања и десетици коментари.
Ваквата руска пропаганда и провокација доаѓа откако европските лидери се обидуваат да најдат мирно решение за надминување на кризата во северно Косово.
„Алијанса за Албанците ја осудува неодамнешната провокација на руската амбасада во Скопје на Твитер, со која сериозно се прекрши Уставот на земјата којшто го признава Косово како независна и суверена држава.Северна Македонија е исто така јасно усогласена со Западот во осудата на руската агресија врз Киев и во одбраната на територијалниот интегритет на Украина. Северна Македонија, како земја кандидат за членство во Европската Унија, не смее да дозволи вакви малигни влијанија од акредитирана амбасада во Скопје. Молкот пред ваквите провокации може да се сфати како легитимирање на проширувањето на руската агенда на Балканот, којашто заедно со воено поттикнувачката политика на Србија кон Република Косово, се директна закана за мирот и безбедноста во регионот, како и саботирање на Европска перспектива на Западен Балкан“, велат од АА.
Министерот за надворешни работи Бујар Османи, истакна дека Република Северна Македонија со внимание ја следи ситуацијата во северот на Косово, чие натамошно влошување може да претставува сериозен предизвик врз стабилноста на регионот.
„Како непосредни соседи на двете земји, упатуваме апел за воздржување од активности кои можат да доведат до ескалација на состојбите, враќање во институциите на системот, и активно и неодложно продолжување со дијалогот кој силно го поддржуваме и охрабруваме.
Изнаоѓањето на трајно решение кое ќе обезбеди меѓусебно признавање и европска иднина за двете земји претставува единствениот начин за долготрајно нормализирање на односите кое е од интерес не само на двете страни, туку и на целиот регион“, објави Османи на својот Фејсбук профил.
На 1 ноември 2022 година, Владата на Република Косово започна со спроведување на планот за пререгистрација на табличките со српски ознаки на градовите во Косово, издаден од Србија, како што е КМ (Косовска Митровица). Планот за пререгистрација требаше да започне на 1 август, откако Косовските власти соопштија дека регистерските таблички ќе бидат заменувани со привремени и дека дополнителните полициски сили се разместени за имплементација на „реципроцитетот“.
Д.М.
