Повеќе од десетина години, ресорните министри за образование и наука во Македонија се лица без искуство во науката и истражувањето! Основање на Агенција за научни истражувања како самостоен и независен државен орган, надлежен за транспарентно, ефикасно и ефективно остварување на Националната програма за научно-истражувачка дејност и за меѓународната соработка, беше предложено на денешната завршна конференција „Предизвици и можности за финансирање на научното истражување во Македонија“, организирана во рамките на Националниот диjалог за jавните политики – Регионална програма за поддршка на истражувањата (RRPP).
Се предвидува Агенцијата за научни истражувања за својата работа да одговара пред Собранието. Причината за овој предлог е фактот што досега не е подготвен документ со кој се регулира финансирањето на научно-истражувачката дејност. Единствен јавно достапен стратегиски документ во областа на науката е Националната програма за научно-истражувачка дејност, која е изработена од Советот за научно-истражувачка дејност (НУД) и е доставена е до Европската комисија, но не е усвоена од македонското Собрание, а за неа не се произнел ни Националниот совет.
Повеќе од десетина години, ресорните министри за образование и наука во Македонија се лица без искуство во науката и истражувањето. Со актуелниот начин на научно-истражувачката работа не се обезбедува ниту независност, ниту транспарентност на целокупниот процес, а оттука, се доведува во прашање и квалитетот на истражувачките резултати. Сето тоа резултира и со сѐ помало учество на македонските истражувачки институции во меѓународните проекти, е ставот на учесниците на завршната конференција.
На конференцијата присуствуваа експерти кои дискутираа на теми поврзани со различни искуства и практики при финансирањето на научното истражување, а целна група беа претставници на академски институции, на истражувачки организации, но и на државни институтци, самостојни истражувачи и наставно-научни работници, како и останати заинтересирани страни.
