„Претседателот на државата, првиот пат го прекрши Уставот со тоа што го дал мандатот на член на партија, којашто нема парламентарно мнозинство. Ако го даде мандатот на втор член од истата партија, тогаш тој по втор пат ќе го прекрши Уставот и заслужува импичмент“, дециден е професорот д-р Светомир Шкариќ, експерт по Уставно право, којшто беше гостин на трибината што ЦИВИЛ-Центар за слобода ја организираше минатата недела, отворајќи ги актуелните прашања во однос на темата: „Македонија во правно и политичко лимбо“.
Според професорот д-р Шкариќ, претседателот на државата има модераторска улога, тој треба да го даде својот придонес во процесот на формирање влада, со тоа што ќе разговара, ќе ги повикува во кабинетот легислативните партии и така ќе го формира своето мислење. Дури потоа, мандатот ќе го даде на член на партија или партии кои имаат парламентарно мнозинство.
Коментирајќи ја актуелната ситуација (тогаш само како хипотеза), што ќе се случува доколку првиот мандатар (Никола Груевски) не успее да формира влада, д-р Шкариќ се повика на член 90 од Уставот на Република Македонија.
„Во Уставот, во член 90 стои дека претседателот е должен да го даде мандатот на член на партија, кандидат на партија или партии, на коалиција на партии, кои може да обезбедат парламентарно мнозинство од 61 пратенички мандат. И, во моментот кога се дава мандатот тоа мнозинство треба да биде обезбедено, а не во процес од 20 дена. Па потоа, да се даде на втор и трет мандатар. Тоа што е направено во 1992 година е кршење на Уставот. Ако нема параламентарно мнозинство, претседателот тогаш ја известува јавноста, Собранието, нацијата…, дека треба да се решава проблемот и да се донесуваат одлуки во зависност од надлежностите. Тоа е доказ дека постојниот пратенички состав од легислативните партии и коалиции не е способен да формира влада, значи, нема ни легитимитет да управува. Тоа е доказ дека не може да владее, затоа треба да се бара решение да се оди на нови избори“, категоричен е професорот Шкариќ.
Што се однесува до веројатноста за евентуална оставка на претседателот Ѓорге Иванов, како би го спречил доделувањето на мандатот на следниот мандатар (Зоран Заев, лидер на СДСМ, партија која има 49 мандати) професор д-р Шкариќ имаше толкување:
„Доколку претседателот не сака да го даде мандатот натаму, или поднесе оставка, тогаш тоа мнозинство има легитимитет да се состане во Собранието, со обезбеден 61 глас од своите редови, да го избере претседателот на Собранието и веднаш да формира влада“, дециден е д-р Шкариќ.
М. Талеска
