Состојбата со водоснабдувањето во Гостивар и случаите на затруени граѓани предизвикаа жесток фронт и политички обвинувања помеѓу власта и опозицијата. Додека Владата тврди дека реагирала институционално и на терен ги бара причините за инцидентот, опозицискиот СДСМ обвинува за свесно прикривање на информации кои директно го загрозуваат здравјето на населението.
Влада: Нема да има компромис, ќе се санкционира секоја одговорност
Портпаролката на Владата, Марија Митева, информираше дека државните институции реагирале брзо и координирано уште од првиот момент. Таа нагласи дека веднаш е воспоставена постојана координација помеѓу Министерството за здравство, Институтот за јавно здравје (ИЈЗ), Центарот за јавно здравје и Државниот санитарен и здравствен инспекторат.
Како итна мерка за помош на гостиварци, Владата одлучи да обезбеди 50.000 литри безбедна вода за пиење, акција која ќе продолжи и во наредните денови.
„Очекуваме целосно расчистување на случајот и утврдување на сите околности. Било каква одговорност која ќе се утврди – институционална, службена или индивидуална – ќе биде соодветно санкционирана. Нема да има селективност, ниту компромис кога станува збор за здравјето на граѓаните“, децидна е Митева, додавајќи дека иако многу од надлежностите се на локалната самоуправа, инспекциите веќе прибираат лабораториски анализи и документација.
Во процесот на информирање на јавноста се вклучија и министерот за здравство Сашо Клековски, директорката на ИЈЗ Марија Андоновска, како и директорот на СОЗР, Ивица Томовски, кои треба да ги соопштат официјалните наоди на владините институции.
СДСМ: Власта крие податоци, министерот за здравство молчел пет дена!
Од друга страна, опозицискиот СДСМ излезе со остри обвинувања, нарекувајќи ги владините соопштенија „класичен обид за бегство од одговорност“ и префрлање на вината исклучиво на локално ниво.
Од партијата соопштуваат дека податоците од анализите на водата намерно се кријат од јавноста и се врши селективен притисок врз обвинителството. Според нив, вистинската кривична одговорност за затруените граѓани во Гостивар мора да лоцира кај највисоките функционери.
„Ако веќе се вршат апсења, тогаш мора да се утврди и кривична одговорност на министерот за здравство и инспекцијата од Министерството за здравство, кои знаеле за труењето, но молчеле пет дена. Ова не е политика, ова е свесно прикривање на информации. Сите кои знаеле и молчеле, сите кои ја криеле информацијата за да ја заштитат партиската структура – ќе одговараат“, порачуваат од СДСМ.
Борбата околу одговорноста за еколошко-здравствениот инцидент во Гостивар продолжува, а граѓаните сè уште ги чекаат конечните и независни резултати кои ќе покажат што точно ја загади водата за пиење.
