За опозициската СДСМ задолжувањето на државата кај унгарската влада од 500 милиони евра е коруптивно и ја носи државата во должничко и политичко заложништво на Унгарија, и поради тоа ќе го блокира во Собранието носењето на законот за задолжување по скратена постапка, најави денеска на прес-конференција претседателот на СДСМ Венко Филипче.
За начинот на кој ќе го сторат тоа, тој објасни дека претседателката на Комисијата за финансирање и буџет Сања Лукаревска, која е од СДСМ нема да го стави овој предлог-закон на разгледување и дека бараат да се носи во редовна постапка.
Одлуката да се носи Законот за задолжувањето на Република Северна Македонија по скратена постапка е без преседан, тврди лидерот на опозициската СДСМ Венко Филипче. Според него, во предлогот со кој државата за прв пат ќе се задолжи директно кај друга држава, во случајов Унгарија, нема јасни критериуми за распределба на позајмените пари, нема јасно утврден систем за контрола на трошењето парите, има точки во кои се кријат скриени трошоци кои не се јасно изразени, па поради ова нема да биде ставен на дневен ред на Комисијата за финансирање и буџет во Собранието со која раководи нивната пратеничка Сања Лукаревска.
„Целта е јавноста да е лишена од можноста детално да види што се крие зад ова задолжување. ВМРО ДПМНЕ го скрати правото на дебата и вклучување на експертската јавност во процесот на носење на самиот закон. Ова јасно упатува на заклучокот дека Владата има многу што да сокрие во овој закон.
Ова потврдува дека задолжувањето е коруптивно и ја носи државата во должничко и политичко заложништво на Унгарија. Мора да е предмет на широка јавна расправа, прецизно да се утврди на секој детал за секој денар кој треба да се плаќа од граѓаните како камата. Во законот има јасно видливи членови и елементи со кои се потврдува корупцијата. Ова задолжување е договорено кога ВМРО ДПМНЕ беше опозиција, целосно вонинституционално и во четири очи“, вели Филипче.
Со Предлог на закон за задолжување на Република Северна Македонија со заем кај Унгарската експорт – импорт банка е предвидено државата да се задолжи со 500 милиони евра. Условите се регулирани во договор за заем кој ќе се склучи помеѓу Република Северна Македонија и Унгарската банка.
Заемот што ќе и биде доделен на нашата земја е со рок на отплата од 15 години, со грејс период од 3 години и треба да биде повлечен во една транша.
Во законот е исто така посочено дека Македонија ќе ѝ плаќа на Унгарската експорт – импорт банка приватно друштво со ограничена одговорност провизија за неповлечени средства во висина од 0,5 отсто од заемот на годишно ниво.
– Провизијата за неповлечени средства ќе се пресметува на дневна основа на неповлечениот дел од заемот, пресметано од датумот на достапност на средствата и ќе се плати првиот работен ден по завршување на периодот на достапност.
Заемот ќе се отплаќа на 24 полугодишни рати, на 15 февруари и 15 август секоја година. Дополнително, Македонија ќе ѝ плати провизија за извршени правни услуги на независна фирма избрана од страна на Унгарската експорт – импорт банка приватно друштво со ограничена одговорност. Провизијата за извршени правни услуги ќе се плати пред повлекување на траншата – се нагласува во законот доставен во Собранието.
Премиерот Христијан Мицкоски денеска, одговарајќи на новинарско прашање на отварањето на спортскиот центар „Бранители“ во Општина Бутел, кажа дека каматата и провизијата кои ќе се плаќаат за овој кредит се многу помали од кредитите кои ги земала претходната влада.
„Цената којашто државата ќе ја плаќа за кредитот е 0,1 процент. Но таа е 0,04 проценти тоа е за адвокатски услуги. Процес кој е стандарден за ваков тип на заеми. Направив анализа колкава провизија плаќала владата на СДСМ и ДУИ во периодот во која таа се задолжувала преку емисија на државни обврзници на меѓународниот пазар. И таа провизија тие што ја плаќале се движи од 12 до 20 пати повеќе од тоа што ние сега како адвокатски услуги го плаќаме за овие 500 милиони. Ќе повторам од 12 до 20 пати“, нагласи Мицкоски.
М. Д.
