Околу 23 илјади членови на СДСМ се подготвени в недела да го изберат новиот лидер на внатрепартиските избори. Од целосна реформа и нов почеток, учење од грешките во минатото, до враќање чекор назад за преиспитување – така размислуваат кандидатите кои се борат за лидерската позиција кај нивното членство.
Венко Филипче, Славјанка Петровска, Јован Деспотовски или Александар Бајдевски – кој ќе ја добие довербата за нов лидер на СДСМ ќе се знае на крајот на месецот, по внатрепартиските избори.
Ако Петровска биде избрана за претседателка, таа најавува целосна реорганизација на партијата, но и промени во начинот на кој се бираат одредени кадри. Според неа, на партијата не ѝ потребно мешање на поранешните претседатели на СДСМ во изборот на новиот претседател, туку сега на партијата најпотребно и е единство. Петровска порача дека доколку не победи на изборите, тогаш нема да бара никаква функција туку дека ќе остане член и пратеничка на СДСМ во Собранието.
„Застанувањето на кој било од поранешните претседатели зад кој било од сегашните кандидати, мислам само дека дополнително да ја подели партијата и мислам дека може да го отежни процесот на легитимен избор на претседател. Јас ги почитувам сите поранешни претседатели на СДСМ затоа што оставиле свој белег во партијата и во државата, меѓутоа мене ми треба поддршката на членството“ рече Петровска во интервју за Канал 5.
Петровска нагласи дека со точно акцентирање кој позиции на каков начин ќе бидат избирани, ќе се отстранат голем дел од недостатоците, кои изминатиот период се покажаа како сериозни и веројатно секој на свој начин допринел за овој лош резултат на изборите.
Јован Деспотовски вели дека стожерот во неговата програма е нов почеток на СДСМ, што би значело целосно прекинување на сите досегашни политики, начинот на нивно спроведување, како и кадровските решенија и зголемено учество на младите во партиските тела, директна вклученост носењето одлуки и креирање политики.
„Јас сум убеден дека веќе на следните локални избори СДСМ ќе покаже, со овој нов почеток и нов пристап во работењето, една нова енергија, дека се враќа на победничките патеки. Очекувам трендот на опаѓање кој го имавме до минатите избори да го превртиме и да тргнеме нагоре и да дојдеме до ситуација во која нема да биде прашање дали, туку кога СДСМ ќе биде носител на извршната власт во Македонија“, истакна Деспотовски на средба со првите луѓе на социјалдемократската младина.
Според Деспотовски, зголемено учество на младите во партиските тела, директна вклученост во носењето одлуки и креирање политики, особено оние кои ги засегаат младите во земјата како и отворање на можности за едукација на младите социјалдемократи и финансиска поддршка се клучните елементи во програмата на Деспотовски – Нов почеток, Нов СДСМ.
Александар Бајдевски се залага за чекор назад, за да се согледа суштината на партијата.
„Некои од моите противкандидати велат дека ни треба нов СДСМ или нов почеток. Јас сметам дека треба да се вратиме чекор назад, бидејќи СДСМ е државотворна партија, која е поставена на постулатите на двата наши Илиндена. И затоа сметам дека тоа е една од основните работи без кои понатаму не можеме да продолжиме“.
Венко Филипче, смета дека СДСМ мора да учи од грешките, а идниот претседател е должен да се погрижи тие никогаш да не се повторат.
„Историјата е нашиот најголем учител, но само ако избереме да учиме од неа. Иднината на СДСМ ќе остане заложник на минатото ако не направиме суштински промени. Ако бидам избран за претседател, моја главна грижа ќе биде грешките од минатото никогаш да не се повторат“ – истакна Филипче.
Тој рече дека како претседател ќе води со пример и ќе се заложи за обединување на партијата преку взаемно почитување и давање глас на членовите. Според Филипче, новото раководство на СДСМ ќе делува суштински различно од сите претходни. Ќе води со пример, со многу чувство и емпатија за секој член дансе чувствува ценет и слушнат. Сила на обединување ќе бидат другарството, еднаквоста и взаемното почитување.
Социјалдемократите во Северна Македонија на 30-ти јуни ќе избираат нов лидер по оставката на Димитар Ковачевски што дојде по историскиот пораз на парламентарните и претседателски избори одржани на 8 мај годинава.
Дамјан Варошлија
