Отсуството на финансиска независност, несоодветен и нестручен кадар, само декларативна политичка волја за унапредување на состојбата на Народниот правобранител се главните проблеми со кои се соочува омбудсманот во својата работа. Ова се дел од заклучоците од денешната презентација на извештајот од граѓанскиот мониторинг на Народниот правобранител со наслов „Омбудсманот – меѓу мандатот и капацитетите“.
Според Народниот правобранител Иџет Мемети, законските измени во делот на неговите надлежности од март 2017 година, не се доволни. „ Законските регулативи не се доволни за функционирање на една институција, доколку нема човечки капацитети и политичка волја, сè уште ќе имаме проблем во работата“, изјави Мемети.
„Искуството во последните десетина годни покажува дека нормативната волја на државата е во расчекор со политичката волја на досегашната власт, која не дозволи целосно осамостојување на Народниот правобранител. Не е овозможена финансиска независност, а тоа се гледа и во фактот дека Министерството за финансии, со години не дозволува вработување на соодветен стручен кадар“, рече Уранија Пировска, извршна директорка на Хелсиншкиот комитет за човекови права.
„Државните институции се затворени и неподготвени за соработка, не постапуваат и ги игнорираат препораките од омбудсманот, а неретко ја опструираат неговата работа. Место да се вработува стручен кадар, се нуди замена со несоодветен кадар од други јавни институции, во договор со власта, што влијае врз независноста на институцијата“, смета Билјана Бејкова, извршна директорка на НВО Инфоцентар.
Според новинарката Гордана Дувњак, Народниот правобранител во Македонија има голем број надлежности но истовремено, рацете му се врзани. „Пет години никој не е вработен, а 17 лица си заминале. Што значи, има дисбаланс помеѓу зголемувањето на надлежностите и професионалниот кадар. Пратениците немаат слух за барањето, вработените во оваа институција да имаат посебен статус, а не како што се сега, јавни службеници. Тие треба да ја мониторираат работата на институциите а истовремено нивното вработување и унапредување зависи од извршната власт. Тоа е апсурд“, истакна Дувњак.
Овој настан се реализираше во рамки на проектот „Граѓански мониторинг на Народниот правобранител“, поддржан од Амбасадата на САД во Македонија.
М. Теговска
