ДРАГАН МИШЕВ
Република Северна Македонија денеска одбележува пет години од зачленувањето во НАТО откако на денешен ден во 2020 година стана 30-та членка на Алијансата. Членството на земјата во НАТО беше оценето како најголемо достигнување во историјата на државата. Со тоа, земјата реализираше една од нејзините стратешки цели.
По повод петгодишнината денеска во Клубот на пратеници во Скопје ќе се одржи средба на министерот за надворешни работи и надворешна трговија Тимчо Муцунски со амбасадорите на земјите-членки и партнери на Алијансата. Според агендата, на почетокот на настанот ќе се обрати министерот Муцунски по што ќе следи затворена дискусија.
И додека земјава ја одбележува пртгодишнината од членството во Алијансата, со што беше исполнета една од стратешките цели на државата, дел од државниот врв присуствува на анти-НАТО собири во соседството.
Вицепремиерот за односи меѓу заедниците, Иван Стоилковиќ присуствуваше на комеморацијата на Денот на сеќавање на жртвите од бомбардирањето на НАТО врз СР Југославија во 1999 година, на аеродромот во Батајница, крај Белград, во првиот ред во друштво на претседателот на Србија, Александар Вучиќ и претседателот на Република Српска, Милорад Додик. Дали вицепремиерот со ова сакаше да испрати сигнал до Алијансата за тоа каде се позиционира државата во новите геополитички групирања?
Премиерот, кој и самиот додека беше во опозиција беше против процесите кои доведоа до членство на нашата земја во Алијансата, немаше јасен одговор зошто неговиот заменик присуствувал на настанот во Белград.
