Мисијата на ОБСЕ во Скопје ќе продолжи да ја поддржува Северна Македонија во напорите за унапредување на сите општествени сегменти, вклучително и образовниот систем. Без понуда на квалитетно образование, не може да се создадат граѓани кои ќе бидат креатори и имплементатори на промените што ги наложува новото време и кои мора да се случат заради интегрирање на државата во европското семејство на развиените земји.
Ова е заклучокот од средбата што денеска ја имаа министерот за образование и наука Јетон Шаќири и новиот шеф на Мисијата на ОБСЕ во Скопје, амбасадорот Килиан Вал, на која се дискутираше за тековните реформски процеси што ги спроведува МОН, особено во делот на основното образование, но и за идните планови што ќе бидат поддржани од оваа организација.
Министерот Шаќири, како што информираат од неговиот Кабинет, посочил дека МОН ќе продолжи да гради хармонична училишна средина во која учениците ќе имаат меѓусебна доверба, ќе се почитуваат и нивна заедничка цел ќе биде вложување на стекнатото знаење во напредокот на својата земја.
-Меѓуетничката толеранција, почитувањето на различностите, взаемното разбирање, толеранцијата, почитта се вредности кои се интегрирани во новите наставни програми во основното образование, а верувам дека, како и досега Мисијата на ОБСЕ на различни начини ќе даде придонес за целосно нивно ефектуирање во наставата, но и преку воннаставни активности, рекол Шаќири.
Министерот нагласил дека следна област за покрупни промени ќе биде средното образование, каде, како што истакнал, голема е поддршката од ОБСЕ кои помогнале во креирањето на новиот предлог Закон за средно образование.
Амбасадорот Вал, кој е добар познавач на приликите во Северна Македонија, имајќи предвид дека повеќе од 20 години работи во регионот, рекол дека Мисијата на ОБСЕ ќе даде нов импулс на образовните политики во следниот период и дека освен поддршката преку тековни проекти и активности, ќе се работи и на воспоставување нови соработки со цел зајакнување на улогата на образовните установи.
Тој потенцирал дека од особена важност е да се промовира и зајакне интегрираното образование, меѓуетничкото разбирање, демократските вредности, изучувањето на јазиците и генерално интекултурализмот за што соработката ќе продолжи и ќе се обезбедат повеќе ресурси за реализација на активностите насочени кон поставените цели.
