Заменик-генералната секретарка на НАТО, Радмила Шекеринска, за време на предавањето во Централниот воен клуб во Софија, изјави дека Русија и тероризмот се најдиректните и долгорочни закани за безбедноста на Алијансата и нејзините партнери, пренесува БГНЕС.
Русија останува најдиректна и долгорочна закана за нашата безбедност, заедно со тероризмот, изјави Шекеринска.
Настанот го отвори почесниот претседател на Атлантскиот клуб, Соломон Паси, кој ѝ го честиташе националниот ден на Северна Македонија подарувајќи ѝ букет на Шекеринска. Паси истакна дека само 4 години по членството во НАТО, Македонија успеа да ја добие првата жена заменик-генерален секретар на алијансата од Европа.
На настанот присуствуваа амбасадорот на Украина, Олесја Илашчук, политичари и јавни личности.
Заменик-генералната секретарка на НАТО, Радмила Шекеринска истакна дека целта на земјите-членки на НАТО е да спречат, да се подготват и да се заштитат од оваа закана.
Таа потсети на неодамнешниот руски напад врз цивилна инфраструктура во Украина со 800 дронови и нагласи дека тоа е доказ оти Москва не е заинтересирана за мир. Според неа, приоритетите на НАТО остануваат јасни – понатамошни инвестиции во одбраната, зајакнување на одбранбената индустрија и постојана поддршка за Украина.
„Без оглед на исходот на војната, Русија ќе продолжи да биде дестабилизирачка сила“, рече Шекеринска.
Според Шекеринска, Алијансата е фокусирана на обезбедување на Украина со она што ѝ е потребно за да се одбрани и да одврати агресија во иднина. Сојузниците на НАТО обезбедуваат 99 отсто од целата воена поддршка на Украина.
Таа ги поздрави напорите на Бугарија која веќе издвојува 2% од БДП за одбраната и најави планови да достигне 5% до 2035 година. „Ова не се трошоци заради трошоци, туку инвестиции за нашата безбедност“, истакна таа.
Заменик-генералниата секретарка на НАТО ги истакна напорите на американскиот претседател Доналд Трамп за прекин на војната во Украина. Средбата минатиот месец во Белата куќа меѓу претседателот Трамп, претседателот Зеленски, генералниот секретар на НАТО и голем број европски лидери беше силна демонстрација на нашето единство, но и на нашата решителност, додаде Шекеринска. Таа, исто така, ѝ се заблагодари на Бугарија за нејзината силна поддршка за Украина, а на сојузниците – да продолжат со оваа поддршка, особено во обезбедувањето клучна воена опрема – системи за воздушна одбрана, оклопни возила, ракети, лесно оружје, муниција.
Дури и кога оружјето конечно ќе замолкне во Украина, долгорочната закана од Русија ќе продолжи, рече Шекеринска, цитирана од БТА. Таа ја истакна работата на Русија и Кина во областа на производството на оружје, како и нејзините контакти со Иран, Северна Кореја и Белорусија.
„Во врска со зајакнувањето на одбранбената индустрија, таа истакна дека декларациите сами по себе не ги одвраќаат противниците, туку се потребни вистински капацитети – огнена моќ, опрема и технологии. Шекеринска додаде дека до крајот на 2025 година, земјите од ЕУ веројатно ќе произведуваат 2 милиони гранати годишно, што е шест пати повеќе отколку на почетокот на војната во Украина. Таа истакна дека сè уште има долг пат во однос на производството на одбранбени системи како што се тенкови, ракети и системи за воздушна одбрана. Заменик-генералниот секретар на НАТО истакна дека бугарската одбранбена индустрија се развива брзо, со бројни производители на муниција и лесно оружје.
Предизвиците со кои се соочуваме се големи, но единството и решителноста на НАТО се поголеми од кога било, рече и Радмила Шекеринска.
На крајот од настанот, Соломон Паси ѝ подари на Шекеринска посебен подарок, нов дизајн за плоча со познатиот автомобил што моментално се наоѓа во седиштето на НАТО – нашиот „трабант“, објасни тој.
Претседателот Румен Радев на средбата рече дека завршувањето на Европскиот транспортен коридор број 8 е од клучно значење за безбедноста на НАТО и регионот. Тој ќе ги поврзе Јадранското и Црното Море.
Радев ја истакна улогата на Мултинационалната борбена група со рамковната земја Италија на полигонот „Ново Село“ и ја нагласи важноста на проектите за модернизација на бугарската армија.
Шекеринска и Радев разговараа и за зголемувањето на уделот од БДП наменет за одбрана, војната во Украина, ризиците и иницијативите за „барање мирно решение преку дипломатија“, соопшти прес-службата на шефот на државата.
М. Д.
