Претставници на синдикалната на прилепскиот загубар „Еурокомпозит“ вчера имаа средба со вицепремиерот Кочо Анѓушев, којашто траеше до доцна синоќа. Притоа, според синдикалците, Анѓушев им ветил итна исплата на една плата и придонеси за здравство, со цел вработените да прекинат со штрајкот, и да продолжат со работа. Наскоро се очекува смена на раководството во оваа единствена фабрика за наменско производство за потребите на одбраната и безбедноста, со целосно државен капитал
„Нѝбеше ветено и дека следна плата ќе ни биде исплатена до 20 јули, а потоа, уште една во август. Исто така, од вицепремиерот Анѓушев добивме ветување дека ќе се запознае целосно со проблемите во фирмата, и ќе се бара, чекор по чекор, конечно решение за овој загубар“, изјавија за ЦИВИЛ Медиа, претставници од синдикатот.
Синдикалците денеска имаат средба со вработените, на која ќе одлучат дали ќе го прекинат штрајкот. ЦИВИЛ Медиа дознава и дека наскоро се очекува смена на раководството во оваа единствена фабрика за наменско производство за потребите на одбраната и безбедноста, со целосно државен капитал.
„Не сме задоволни ниту од ова, ниту од претходните раководства, сите директори се блиски на партијата која што е на власт, но факт е дека никој од нив досега не работеше во интерес на фирмата и вработените, туку за да си ги штити своите, лични интереси! Но, веќе нема простор натаму, овој пат, очекуваме да се именуваат квалитетни кадри, со кои што ќе се реши конечно прашањето на ‘Еурокомпозит’“, порачуваат вработените.
Во овој загубар се вработени 280 лица на возраст од над 50 години. Од почеток на транзицијата, „Еурокомпозит“, како фирма ќерка на некогашниот гигант „Еуроинвест 11 Октомври“, стои на стаклени нозе. Вработените добиваат плата, речиси само со штрајк. Работа никогаш нема обезбедено за целата година, не се искористени расположливите капацитети, а ресорните министерства за внатрешни работи и за одбрана склучуваат од време – навреме, парцијални договори што се рефлектира врз финанскиот биланс на фирмата. Од 2012 не им е платен стажот на вработените, регистрирана е во меѓувреме нова фирма „Композитна опрема“ за која работат два часа дневно, и преку таа фирма им се плаќаат придонесите за здравствено осигурување… Прашањето е: до кога вака?
Моника Талеска
