Седум млади студенти од Македонија се автори на едукативната електронска игра „Сива зона“ наменета за средношколци, чија цел е подигнување на свеста за корупцијата и последиците од неетичките избори.
Играчот, како што информираат од тимот на „Сива зона“ ја презема улогата на средношколец во последната година од своето средно образование, затекнат на патот да одлучи каде ќе ги продолжи своите студии и високо образование, откако добива прекрасна можност за стипендија на одличен универзитет во странство, но, времето за аплицирање на стипендијата е кратко.
– За да успее, играчот мора да помине низ серија предизвици и ситуации што ја одразуваат реалноста – подготовка на документи, административни процедури, разговори со институции и полагање на тестови. На секој чекор, играчот се соочува со избор: да оди по чесен пат и да вложи труд, или да избере коруптивни практики што на прв поглед изгледаат како побрзо решение. Одлуките што ги презема го водат играчот низ „сива зона“ – простор во каде границата помеѓу етички исправните постапки и нелегалните дејствија е неодредена и тешко разграничена. Секој избор има последици врз текот на приказната и крајниот исход: добивање на стипендијата на чесен начин, губење на можноста или постигнување на успех преку коруптивни практики што оставаат негативни траги, се појаснува во соопштението.
Играта нуди повеќе сценарија и завршетоци, се истакнува во соопштението, што ја прави повторно игрива и интерактивна, а истовремено поттикнува критичко размислување кај младите за важноста на интегритетот, етичките избори и последиците од корупцијата.
Од тимот се осврнуваат и на целите на играта што се сака да се постигнат.
– Младите се соочуваат со реални коруптивни ситуации. Се поттикнува критичко размислување, морална проценка и активна рефлексија на одлуките што ги носи секој играч – во процесот на играње на секој играч му се мери интегритет, репутација, време и пари. Се промовираат вредности како интегритет, чесност и отпор кон корупција. Се создава долготраен ресурс што ќе се користи во наставни и неформални едукативни средини, се додава во соопштението.
Иницијативата е спроведена од страна на седум млади студенти како неформална група, а истата се спроведува во рамки на проектот „Иновативно антикорупциско застапување и младинско ангажирање“, што го спроведува Младински совет – Прилеп. Проектот е дел од програмата за мали грантови на СЕЛДИ што се спроведува во рамки на проектот „Граѓанско општество за добро владеење и антикорупција во Југоисточна Европа: Градење на капацитети за застапување врз база на докази, влијание врз политики и граѓански ангажман (СЕЛДИ.нет)“, финансиран од Европската Унија.
Играта јавно ќе биде достапна од 5 октомври на веб-страницата sivazona.mk. Промоцијата се одржа на 26 септември во Скопје.
Фото: Тим на „Сива зона“
