ЉУБОМИР КОСТОВСКИ
Уставниот суд, кој нормално требаше да го спасува системот на кој се одредуваат усогласувањата, што се вели не само кај нас туку и во целиот НОРМАЛЕН СВЕТ, тоа не го стори, падна на најниски гранки од кога знам или се интересирам што прави оваа институција.
Имено, Судот толку ниско ја наведна кичмата пред дневната политика по ова прашање што ниту едно од оние соопштенија и привидни отворања пред јавноста што се вршат во последно време не се вредни да се споменат, кога мислењата и ставовите на самите судии се менуваат преку ноќ, пред очевиден притисок кој се врши веројатно поединечно врз нив по ова прашање (значи и за други теми) зад врата!
Во исто време рецесивната политика и кон платите се покажа вчера кога претставникот на Сојузот на синдикатите на Македонија (ССМ) ја напушти последната седница на Економско-социјалниот совет (ЕСС), револтиран од предлогот минималната плата да се усогласи за само околу 1 600 денари. Претседателот на ССМ, Слободан Трендафилов, преку социјалните мрежи обвини дека Владата, работодавачите и останатите синдикати застанале на иста страна против реално зголемување на примањата на работниците.
Според Трендафилов, денеска имало обид законското усогласување на минималната плата да се протурка без суштинска дебата за реалните потреби на работниците. Трендафилов децидно посочи дека Сојузот на синдикати нема мандат да учествува во вакво усогласување, поради што нивните претставници демонстративно ја напуштиле седницата на ЕСС.
Јасно, власта го искористи трикот за да дозволи кој стигне да се смета за синдикат па сите нејзини „квисковци“ во оваа сфера ги прогласи за регуларни гласачи, па во еден изнуден мизансцен си ја изигра претставата по која капиталот ќе ја зголемува својата добивка на сметка на празните стомаци!
Ете тоа се случува во земјата во која министерката за финансии не знае каде и се изгубиле 200 милиони евра од Буџетот?!
