Здружението за поддршка на деца и млади со различности „Сината птица“ ја претстави детската електронска сликовница „Иван и Илина“ од авторката Мимоза Петревска Георгиева, која ги отсликува реалните ситуации кога едно типично дете ќе се сретне со дете со Даунов синдром.
Според авторката, сликовницата, покрај тоа што ги отсликува овие ситуации, зборува и за запрашаноста, дилемите и стравовите со кои се соочува тоа дете и неговата потреба од соодветни одговори.
Сликовницата, според издавачот, е наменета за типичните деца на возраст од седум -12 години, бидејќи истражувањата покажуваат дека токму на оваа возраст децата ги градат негативните стереотипи за луѓето со било каква различност. Таа содржи и корисни совети напишани на приемчив јазик за децата на оваа возраст, за тоа кои се спецификите на нивните врсници со Даунов синдром, како и корисни препораки како да се однесуваат со нив.
Илустрациите се на академската сликарка Маја Стефановска, а дизјанот е на уметникот Ѓорѓе Јовановиќ и е реализирана со поддршка на Град Скопје.
А.П.
