Насер Селмани, претседател на Здружението на новинари на Македонија, во интервју за ЦИВИЛ Медиа, компаративно ја инкорпорира улогата на слободата на изразување, медиумската слобода и активизмот во контекст на промените на политичката сцена во Македонија.
Со Селмани разговаравме и на тема притисоци и закани на центрите на моќ и начинот на справување, лично, но и како дел од ЗНМ, како и за препораките како да се одбранат овие придобивки на едно демократско општество.
На почетокот тој истакна дека слободата на изразување и медиумската слобода се суштината на едно демократско општество.
„Во сите земји со нефункционална демократија, не случајно, прв индикатор е отсуството на слободата на изразување“, истакна Селмани за кого таа претставува една креативна сила за едно општество да дојде до израз, а власта да се однесува одговорно.
На прашањето за начинот на кој ги поддржуваат и промовираат слободата на изразување, медиумската слобода и активизмот, Селмани истакна, дека колку и да звучи нескромно, ЗНМ е всушност промотор на медиумската слобода и секогаш како здружение се залагаат за општото добро.
Што се однесува до притисоците од политичките и бизнис центри на моќ, Селмани се наврати на периодот пред промените на политичката сцена. За претходната власт, нагласи дека ги исцрпеле сите можни механизми за притисок и закани.
„Ако сака некој да ги искористи сите механизми на државата за да ни врши притисок, закани, да не тужи, со тепање, со убивање, ние ништо не можеме да направиме, бидејќи сме многу слаби во однос на целиот тој државен механизам кој може ако сака да ни наштети“, изјави Селмани.
Една од препораките е да се создаде амбиент во кој слободата на изразување ќе биде нешто нормално без луѓето да имаат страв дека ќе има последици од тоа. Исто така, Селмани нагласи дека нападите на новинарите треба да се сфатат на сериозен начин и да се решаваат навремено.
Биљана Јордановска
Камера: Дехран Муратов
Овој проект е финансиран од Европската Унија преку програмата за мали грантови „Заштита на слободата на медиумите и слободата на изразување во Западен Балкан“ спроведена од Здружението на хрватските новинари, како дел од регионалниот проект „Регионална платформа на Западен Балкан за слобода на медиумите и безбедност на новинарите”, спроведена преку партнерство на шест регионални новинарски здруженија – Здружение на независни новинари на Србија, Здружение на новинари од Босна и Херцеговина, Здружение на новинари на Хрватска, Здружение на новинари на Косово, Здружение на новинари на Македонија и Синдикатот на медиуми на Црна Гора.
