Обвинителството за организиран криминал денеска соопшти дека ќе го бара фотографот што вчера го сликаше Никола Груевски во Будимпешта. Како Груевски стигна до Унгарија уште се истражува. Обвинителката Вилма Рускоска ги очекува снимките од Црна Гора, а очекуваат информации и од албанското обвинителство. Инаку фотгорафијата вчера беше објавена на Твитер од новинар на Гардијан.
Устав
Уставниот суд ја отфрли иницијативата да се оценува уставноста на одлуката на Собранието за уставни измени донесена на 19 октомври. Пред донесувањето на одлуката на Судот, меѓу судиите имало бурна расправа за тоа дали треба да се прифатат двете иницијативи поднесени од Светскиот македонски конгрес и од адвокатот Томе Тодоровски од Свети Николе.
27 април
Собраниската работна група за помирување денеска го утврди предлог текстот на законото решение за помилување за учесниците во настаните од 27 април. Предлог текстот ќе треба да се разгледа и од Координативното тело за помирување, а ако го прифати како предлог закон ќе биде пуштен во собраниска процедура за да се носи во скратена постапка.
Сепак, од ВМРО -ДПМНЕ не се откажуваат од ставот дека треба да има целосна амнестија за настаните од 27 април 2017 во Собранието.
Корупција
Денеска е актуелен и Законот за спречување на корупцијата кој ќе го регулира и застојот во формирањето на новата Антикорупциска комисија, а за кој се очекува наскоро да биде усвоен. Со овој Закон се предвидува контрола на богатството на функционерите, а се прошируваат и овластувањата на ова тело, така што анкетен лист, покрај функционерите, ќе мора да доставуваат и нотарите и извршителите.
Екстремизам
На социјалните мрежи повторно се појави повик за екстремно насилство. Преку овој повик се потикнаа навивачките групи да се наоружаат за преспетка со полицијата бидејќи „За Македонија се работи“.
Права
На 12 декември, ЦИВИЛ потсетува на 12 член од Универзалната декларација за човекови права кој гарантира право на приватност: Никој не смее да биде изложен на произволно мешање во приватниот живот, семејството, станот или преписката, ниту на напади врз честа и угледот. Секој има право на заштита од законот против вакво мешање или напад.
Со слоганот „Слобода, правда, еднаквост“, ЦИВИЛ – Центар за слобода иницира Месец на активизам за човековите права во текот на целиот месец декември.
Б. Јордановска
