Граѓаните на Словенија денеска (22 март) излегуваат на парламентарни избори кои се оценуваат како клучен тест за идната политичка насока на земјата и нејзината демократска стабилност.
На изборите, 10-ти по ред, се избираат сите 90 пратеници во Државниот збор, која потоа ја гласа новата влада со мандат од четири години.
Главната изборна битка се води меѓу актуелниот премиер Роберт Голоб и неговото либерално движење „Слобода“, и лидерот на десничарската опозиција Јанез Јанша, кој се обидува да се врати на власт.
Анкетите и аналитичарите најавуваат неизвесна и тесна трка, при што ниту една партија најверојатно нема да обезбеди апсолутно мнозинство, што значи дека клучна ќе биде постизборната коалициска математика.
Изборите се одвиваат во атмосфера на силна политичка поларизација и контроверзии. Кампањата беше обележана со обвинувања за корупција, остри политички напади и предупредувања за можни обиди за странско влијание и дезинформации за што медиумската платформа на ЦИВИЛ објави опширна анализа.
Аналитичарите оценуваат дека овие избори не се само избор меѓу партии, туку и судир на два политички концепта – либерална, проевропска ориентација, наспроти популистички и националистички пристап кон владеењето.
Словенија, членка на ЕУ и НАТО со околу два милиони жители, досега важеше за стабилна демократска приказна во регионот. Сепак, падот на довербата во владата и растот на десницата отвораат прашања за идниот курс на земјата, за што пишува словенечката писателка Ана Шнабл во The Guardian.
Гласањето се спроведува на околу 3.000 избирачки места со ангажман на 20.000 изборни работници, што го прави најголемата граѓанска операција во земјата, според официјалниот словенечки портал GOV.SI.
Првите резултати се очекуваат вечерва, додека формирањето на нова влада може да потрае неколку недели, во зависност од исходот и можностите за коалиции.
ЦМ Деск
