Пратеникот од редовите на ВЛЕН, Фатмир Лимани вчера на својот Фејсбук профил сподели фотографија со мандатарот Мицкоски, Изет Меџити и пратеникот од Европскиот фронт, Исмаил Јахоски.
Во описот на фотографијата Лимани не напиша ништо освен знакот „прашалник“, оставајќи простор за шпекулации дека можеби пратеникот Јахоски го сменил партискиот „дрес’ и преминал на ВЛЕН, односно во парламентарното мнозинство.
Јахоски во врска со овие гласини за ТВ21 демантираше дека ќе го напушти Европскиот фронт и ќе премине во друга политичка групација.
Пратениците на 8 мај околу 3 часот по полноќ со 88 гласа „за“ и 22 „против“ го изгласаа законот за организација и работа на органите на државната управа со кој се предвидуваше реорганизација на владата.
За законот гласаа пратениците на ВМРО-ДПМНЕ, ВЛЕН и ЗНАМ, но и ДУИ од Европскиот фронт, кои иако првично не го поддржаа, се предомислија по средбата со претставници на ВМРО-ДППМНЕ, кои за возврат добија ад-хок комисија.
Во меѓувреме во Собранието продолжува расправата за избор на новата Влада предложена од мандатарот Мицкоски.
Пратеникот од ВМРО-ДПМНЕ Никола Мицевски денеска, во рамки на собраниската седница за избор на новата влада, ги повика колегите од турските партии да му се приклучат на владејачкото мнозинство за, како што рече, сите заедно да работат на подобрување на состојбите во државата.
Ова „фрлање ракавица“, како што истакна Мицевски, следуваше откако претходно, Бејџан Илјаз од коалицијата Европски фронт изрази загриженост дека во новиот владин состав нема ниту еден претставник од труската заедница.
Новата Влада што ја предложи Мицкоски ќе брои 24 члена. Покрај премиерот, ќе има уште 23 вицепремиери и министри, од кои 20 со ресор.
Во владиниот кабинет, 15 членови се од коалицијата предводена од ВМРО-ДПМНЕ, шест од коалицијата Вреди и двајца од ЗНАМ.
Н. Абдурахмани
