Цивика Мобилитас е програма за поддршка на граѓанското општество на Швајцарската агенција за развој и соработка (СДЦ) што ја спроведуваат НИРАС од Данска, Македонскиот центар за меѓународна соработка (МЦМС) од Македонија и Шведскиот институт за јавна администрација (СИПУ) од Шведска.
Цивика Мобилитас со доделување на новите институционални, акциски и ад-хок грантови на 9 јули 2019, ја интензивираше третата фаза од програмата што започна на 1 јануари 2019 година и ќе трае до 31 декември 2022 година.
Визијата на програмата е општествените промени во Северна Македонија да бидат поттикнати од силен граѓански сектор, активни граѓани и добра соработка со властите, што би резултирало со потранспарентно, поотчетно и социјално-инклузивно управување како на централно, така и на локално ниво.
Затоа граѓанските организации што влегоа во семејството на Цивика Мобилитас се од секторот на информации, комуникации и медиуми; но и во секторите за човекови права развој на граѓанското општество, владеење на правото, антикорупција, ЛГБТИ, добро владеење, животна средина, и деца, млади и студенти.
Од грантистите во наредниот период се очекува создавање подобри услови за развој на граѓанското општество преку креирање механизми за подобра соработка помеѓу властите и граѓанските организации и зголемување на јавното финансирање за граѓанското општество, граѓанските организации да овозможат активно учество на граѓаните во граѓанските иницијативи како и во волонтерските активности и да создадат услови за добра меѓусебна соработка и партнерства. Се разбира, една од активностите што позитивно би влијаеле на општествените промени е нивното активно учествуво во јавните политики и носењето одлуки кои водат кон подобри политики и практики.
ЦИВИЛ е еден о институционалните грантисти на Цивика Мобилитас која на доделувањето на сертификатите беше претставена како организација која во наредните три години ќе работи на унапредување на човековите права и слободи преку спојот на активизмот, аналитиката и медиумската продукција како дел од нејзините проектни активнсости и како организација со долгогодишно искуство во изборните процеси и заштитата на гласачкото право.
За институционални грантови се пријавиле 144, а добитници се 15 граѓански организации, додека за акциски грантови се пријавиле 131, а добитници се 12 организации. Вкупниот буџет за три години изнесува 318.600.000 денари.
Новитет во програмата на Цивика Мобилитас е списанието „Граѓаните за промена“ како гласник на програмата но и на целото граѓанско општество. Списанието им е посветено на граѓаните како корисници на услугите на граѓанските организации но, исто така и како иницијатори и учесници во општествените промени. Првиот број опфаќа период од шест месеци, а следните изданија ќе бидат квартални. Списанието ќе се подготвува и објавува на македонски, албански и на англиски јазик и ќе има само електронска верзија.
Б. Јордановска
