Според претседателот на Советот на јавни обвинители Петар Аневски, поради немање кворум е одложена седницата на која требаше да се избере времен наследник на Марко Зврлевски, разрешен заради нестручно и несовесно работење, непостапување и постапување спротивно на законот.
Времениот наследник на Зврлевски, најверојатно ќе биде избран во вторник, 29 август, доколку во Советот не се создаде уште некој проблем со одлучувањето, што може да се очекува. Зашто, по опструкциите на ВМРО-ДПМНЕ, со кои опозицијата на сите начини, со карикатуралните реплики на излагањата и репликите на сопартијците, на маратонските седници на Собранието се обидуваше да го пролонгира разрешувањето на контроверзниот државен обвинител, изгледа, сега на ред за нови блокади за реформите е Советот на јавни обвинители, чиј претседател и досега се експонираше како поддржувач на Зврлевски и опонент на Специјалното јавно обвинителство.
А веќе е извесно дека постапката за избор на нов државен обвинител ќе се пролонгира дури по локалните избори, поради совпаѓањето на термините со кампањата. Иако Владата во вторникот (22 август) му предложи на Собранието да ја почне постапката за избор на нов обвинител, Владата ќе може да ги разгледува апликациите на пријавените кандидатури, откако своето мислење ќе го даде Советот, за потоа, најверојатно дури по изборите на 15 октомври, за именувањето да одлучи Собранието со просто мнозинство.
