(МИА) Иранската револуционерна гарда вчера прогласи крај на антивладините протести што почнаа на 28 декември, во кои загинаа најмалку 21 лице, а уапсени се повеќе од 450 демонстрранти.
По прогласот на Гардата има помалку вести за протестите, но се уште не е познато дали тие навистина завршија или пак иранските власти ги блокираат социјалните мрежи со цел да ги оневозможат демонстрантите да поделат нови слики од протестите.
Протестите во Иран почнаа поради мерките за штедење што претседателот Хасан Рохани ги воведе во 2013 година кога дојде на власт. Политичките аналитичари истакнунваат дека незадоволството на Иранците од финансиската ситуација е видливо подолго време, а помали протести и штрајкови на синдиактите има веќе неколку години.
Тие исто така посочуваат и дека граѓаните се незадоволни поради укинување на граѓански слободи.
Протестите укажуваат и дека голем број Иранци не се согласуваат со надворешната политика на Техеран, како што се интервенциите во Сирија и во Ирак, борбата за влијание со Саудиска Арабија или финансиската поддршка на Палестинците и на либанскиот шиитски Хезболах и оценуваат дека Владата треба да се насочи кон домашните економски проблеми.
Иранските државни медиуми вчера известуваа и за провладин митинг во десетина градови, додека денеска јавија дека пред почетокот на викендот, што во Иран почнува во четврток, на улиците во Техеран е мирно.
Десетици илјади Иранци, кои ги поддржуват врховниот верски водач, ајатолахот Али Хамнеи и претседателот Рохани вчера учествуваа во контрапротестите собири организирани во најголемите градови. Тие носеа транспаренти на кои пишуваше „Смрт на Америка“, „Смрт на Израел“ и „Смрт на Монафег“, кратенката на опозициската вооружена група Народни муџахедини.
За разлика од прореформските протести од 2009 година поради повторниот избор на Махмуд Ахмадинеџад за претседател, сегашните демонстрации изгледаат поспонтани, а забележително е и присуството на млади луѓе од работничка класа. Според аналитичарите тоа е поопасно за власта, бидејќи посиромашните слоеви ги смета за полојални, за разлика од средната класа, која излезе на улиците во 2009 година.
Според официјални податоци 90 отсто од приведените демонстранти се помлади од 25 години, кои се позаинтересирани за работа и промени отколку за исламски идеализам и антизападно расположение.
Иранските власти досега се воздржани и покрај тоа што се уапсени над 450 лица, сепак не ги ангажира елитните сили – револуционерната гарда и милицијата Басиџ.
Ајатолахот Хамнеи и Рохани во вторникот ги обвинија „непријателите на Иран“ за поттикнување на масовните протести.
– Во изминатите денови непријателите на Иран користат разни инструменти – пари, оружје, политика и разузнување, за да создадат проблеми во Исламската Република, обвини ајатолахот Хамнеи.
И Рохани изјави дека протестите се помогнати од страна на САД и од Израел, кои „не можат да ги поднесат геополитичките успеси на Иран“.
Американскиот претседател Доналд Трамп и израелскиот премиер Бенјамин Нетанјаху им изразија поддршка на демонстрантите, додека пак Русија и Турција повикаа странски држави да не се мешаат во иранските политички прашања.
Марина Илиевска
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
Одговорноста за редакциското опремување на текстовите (наслов, наднаслов, фотографија, тагови) е на ЦИВИЛ Медиа.
