Собранискиот спикер, Талат Џафери денеска во Собранието се сретнал со претставници на парламентарните парии. Во јавноста нема информации за што се разговарало, но логично е дека тема на средбата била функционирањето на парламентот и локалните избори. Претходно, Џафери најави дека во понеделник ќе одржи координативна средба со претставници на парламентарните групи, на која што ќе се разговара за локалните избори.
Џафери изради подготвеност веднаш да ја започне процедурата за измена на Изборниот законик, доколку парламентарните партии постигнат договор. Тој ги повика политичките партии итно да разговараат за локалните избори, зашто отсуството на адекватно решение, може да доведе до блокада на работата на општините. Граѓаните ќе бидат доведени во безизлез, нема да можат да ги остварат своите потреби и права, затоа што мандатите на градоначалниците и општинските совети истекува во понеделник.
Два дена пред истекување на мандатот, и градоначалниците бараат од пратениците итно законско решение за локалните избори. И СДСМ перманентно го повикува Ѓорге Иванов веднаш да го додели мандатот, за пратениците да изнајдат итно законско решение за организирање на локалните избори, а од ВМРО-ДПМНЕ, вчера понудија три датуми за локалните избори – во јули, септември и октомври.