Ставовите на анкетираните граѓани кореспондираат со дијагнозата поставена во последниот извештај на Европската комисија, каде Македонија е дефинирана како „заробена држава“. Партикуларниот начин на владеење каде институциите работат на еден начин за една група на граѓан(к)и и на друг начин за други, е условот што треба да биде исполнет за една држава да се карактеризира како заробена. Ова беше презентирано на денешната панел дискусија „Што нé спречува во успешна борба против корупцијата“, во организација на Институтот за демократија „Социетас Цивилис“ (ИДСЦС).
Дефинирајќи го поимот „заробена држава“, Миша Поповиќ од ИДСЦС, вели: „Заробена држава е состојба во која јавните институции работат за приватни интереси (елити, фирми, лоби групи…), и тоа, од полиција до републиката како државно уредување. Политичките елити ги киднапираат институциите за да работат во нивен интерес, најчесто во интерес на политичката партија на власт“.
Партикуларниот начин на владеење каде позицијата во општеството е пресудна за успех се рефлектира во сите сфери во општеството, велат од ИДСЦС.
„Што се однесува на перцепцијата на граѓан(к)ите, 75% сметаат дека корупцијата е веројатна. Во пракса, на 30% им било побарано мито, а само 1% од нив одбиле да дадат мито. Ова покажува дека граѓан(к)ите го очекуваат ова однесување и очекуваат ваков начин на владеење од институциите“, истакна Поповиќ.
Истражувањата кои се однесуваат на перцепцијата за корупција, покажуваат дека најраспространета дискриминација е по партиска основа, многу пред другите видови на дискриминација: расна, полова, верска…
Поради овие причини Македонија е позиционирана на 90 место во светот, според Индексот за перцепција на корупцијата на „Транспаренси Интернешнел“.
„Во последните неколку години се забележува потфрлање во спроведувањето на надзорните и контролните надлежности: непреземање активности за следење на користењето на буџетски средства во време на избори, намалување на активности поврзани со следење на имотната состојба на избрани и именувани лица, опаѓање на бројот на барања за поведување прекршочни постапки и барања за кривично гонење“, вели Марија Саздевски од Македонскиот центар за меѓународна соработка, која се осврна на работата на Државната комисија за спречување на корупцијата.
Панел дискусијата е дел од серијата настани „Форум за анти-корупција во земјите од Западен Балкан“, поддржани од Советот на Европа и Интернационалниот фонд на Вишеград.
