НАТО не се сомнева дека Северна Кореја и дава значителна воена поддршка на Русија за да продолжи со својата агресивна војна во Украина, изјави генералниот секретар на НАТО, Јенс Столтенберг, во интервју за „Кјодо њуз“, пренесува Укринформ.
Запрашан за улогата на Северна Кореја во војната во Украина, Столтенберг рече дека „нема сомневање“ дека азиската земја обезбедува „значајна воена поддршка“ на Русија.
Според него, Алијансата не исклучува дека за возврат, Москва може да му обезбеди техничка помош на Пјонгјанг во програмите за развој на оружје или да испорача одредени видови оружје.
Иако одби да открие чувствителни разузнавачки информации, тој рече дека е „апсолутно јасно“ дека 32-члената алијанса е „длабоко загрижена“ поради можноста Русија да ги поддржи ракетните и нуклеарните програми на Северна Кореја во замена за добивање муниција и друго оружје од Пјонгјанг.
Тој нагласи дека во однос на позадината на Кина, Северна Кореја и поддршката на Иран за руската брутална агресивна војна против Украина, партнерството на НАТО со Јапонија станува многу важно, а со цел да се одговори на сè повеќе меѓусебно поврзаните безбедносни предизвици на Европа и Азија, Алијансата очекува проширување на заедничките вежби со Јапонија во различни области, од поморски до сајбер простор.
Цитирајќи ја често употребуваната фраза на јапонскиот премиер Кишида дека „она што се случува денес во Украина може да се случи утре во Азија“, тој рече:
„Во интерес на сите нас е да го спречиме претседателот Путин да победи во Украина“.
Како што предходно објави ЦИВИЛ Медиа, на крајот на 75. Самит на НАТО во Вашингтон беше усвоен Украинскиот договор со кој беше дополнета заедничката декларација на Г7 договорена на претходниот самит на Северноатлантската алијанса во Вилнус, кој треба да и овозможи на Украина победа во борбата против руската агресија, да одврати и да обезбеди сигурна заштита од таква агресија во иднина.
Драган Мишев
