Во годишниот Извештај на Стејт департментот за состојбата со човековите права во 2016 година, во делот кој се однесува на Македонија се вели дека најзначајните проблеми со човековите права во земјата произлегуваат од сеприсутната корупција и од неуспехот на Владата – целосно да го почитува владеењето на правото, вклучително и постојаните напори за ограничување на слободата на медиумите, мешањето во судството, попречувањето на работата на Специјалното јавно обвинителство, како и селективното спроведување на правдата.
„Владејачката партија ВМРО-ДПМНЕ, постојано ја попречува работата на Обвинителството и јавно го критикува специјалниот обвинител Катица Јанева, тврдејќи дека е некомпетентна и политичка алатка на опозицијата. Помилувањата на претседателот Иванов во април минатата година, за два месеца ги замрзнаа повеќето од случаите на Специјалното обвинителство. Судскиот систем, исто така, одигра своја улога во попречувањето на ефективноста на канцеларијата на Специјалниот јавнен обвинител,“ се наведува во извештајот.
Во извештајот се забележани и бројни напади врз новинари и медиумски работници, малтретирање на затвореници и лоши услови во затворите, а се посочува и дека Владата недоволно истражува, процесира и казнува официјални претставници кои направиле прекршоци, вклучително и прекумерната употреба на сила на полициските службеници.
Општите заклучоци на светско ниво се дека состојбата со основните слободи на изразување и собири низ светот е сериозно влошена. Стејт департментот потецира дека се влошени и условите за работа на активистите за човекови права, како и на опозициските партии и групи во голем број земји.
„Корупција, употреба на тортура, сексуално малтретирање на жените и дискриминација против малцинствата се зголемени во некои делови од светот. Во нагорна линија се движи ограничувањето на медиумите и интернет слободата, како и сузбивање на политичките опозициски групи и неможноста народите сами да избираат свои влади. Во Филипини е констатирано дека расте бројот на убиствата на дилерите на дрога од полицијата, но и од други лица кои не се припадници на силите на редот. Во Турција во 2016 година се уапсени илјадници луѓе кои владата, најчесто без докази, ги обвини дека го поддржале обидот за воен удар. Особено загрижува фактот дека во Турција масовно се апсат новинари. Во Кина и понатаму е присутна репресијата на лицата што се занимаваат со заштита на граѓанските и политичките права, а како резултат на тоа, и понатаму има десетици илјади политички затвореници, иако кинеските власти го негираат ова. Во Венецуела постои систематска и политизирана употреба на судството со кое се застрашуваат и се гонат критичарите на власта“, се наведува во извештајот на Стејт департментот.
