Светскиот ден на фотографијата се одбележува на 19 август со цел да ги инспирира фотографите ширум планетата да споделат фотографии со едноставна цел: да го споделат својот поглед на свет со светот. Овој ден е посветен на уметноста, занаетот, науката и историјата на фотографијата.
Светскиот ден на фотографијата е одреден според датумот на кој е изработен првиот дагеротип, фотографски процес развиен од Французите Луи Дагуер и Јозеф Никефор во 1837 година.
На 9 јануари 1839 година, Француската академија на науките го објави процесот наречен дагеротип, а на 19 август, француската влада го купува патентот и го објавува изумот како „бесплатен подарок за светот“.
Првата трајна фотографија во боја е направена од Томас Сатон во 1861 година. Таа претставува збир на три црно-бели фотографии направени преку црвени, зелени и сини филтри. Сепак, фотографските емулзии кои тогаш биле во употреба, биле нечувствителни на спектарот, па резултатот бил далеку од совршен и начинот на кој се дошло до овие колор фотографии наскоро биле заборавен.
Првата дигитална фотографија е направена во 1957 година; скоро 20 години пред инженерот на Кодак да ја измисли првата дигитална камера. Фотографијата е дигитално скенирање на снимка првично направена на филм кој го прикажува синот на Расел Кирш (Кирш е поранешен американски инженер во Националното биро за стандарди кој го развил првиот скенер за дигитални слики) и има резолуција 176х176 пиксели.
Но, фотографијата од самиот свој почеток го покажала огромниот потенцијал не само за овековечување на еден момент кој трајно ќе биде сведок за некој настан, туку како начин да се влијае на промени, да се посведочи за неправдите, подеднакво како и за најновите модни трендови.
Од своите почетоци, пред дваесет години ЦИВИЛ посветува огромно внимание на фотографијата. Од секој настан, ЦИВИЛ има богата колекција на фотографии.
На 19 август 2010 година, Иницијативата Светски ден на фотографијата ја организираше својата прва глобална галерија преку Интернет. Речиси 270 фотографи споделија свои слики и луѓе од над 100 земји ја посетија веб-страницата. Оттогаш, голем број љубители на фотографијата, професионалци и аматери ширум светот го одбележуваат Светскиот ден на фотографијата.
Во чест на Светскиот ден на фотографијата, Редакцијата на ЦИВИЛ Медиа направи кратка селекција од својата богата архива со преку 100.000 фотографии. Еден мал дел од таа колекција е објавен и на заедничкиот Фејсбук профил на организацијата и редакцијата.
Биљана Јордановска
Фотографиите во прилог се авторски придонес на тимот на ЦИВИЛ. Преземањето не е дозволено.