Северна Кореја е подготвена да разговара со САД, но нема да ги прифати предусловите за дијалогот, изјави денеска портпаролот на севернокорејското Министерство за надворешни работи.
– Во текот на децениските разговори помеѓу Северна Кореја и САД, нема ниту еден случај кога разговаравме со САД под какви било предуслови и така и ќе остане. Американскиот однос откако покажавме дека планираме разговори не наведува на помислата дека САД не се заинтересирани за продолжување на дијалогот, посочи портпаролот.
Тој истакна дека „доследниот и принципиелен“ став на Северна Кореја е „дипломатски да ги решава споровите и мирно по пат на дијалог и преговори“.
– Дијалогот што го сакаме има за цел да разговараме и да ги решиме прашањата од взаемен интерес како две рамноправни држави, истакна портпаролот на севернокорејското МНР.
Ставот на администрацијата на американскиот претседател Доналд Трамп е дека Северна Кореја мора да покаже дека е подготвена да се откаже од нуклеарната и ракетна програма пред да има какви било разговори.
САД на 23 февруари соопштија дека воводуваат нов пакет санкции кон Северна Кореја со цел да го натераат Пјонгјанг да се разоружа. Тогаш Трамп предупреди дека тоа е „фаза два“, која би можела да биде „многу несреќна по светот“ ако не би имале ефект таквите чекори.
Претходно, севернокорејската новинска агенција КЦНА објави дека Северна Кореја „на свој начин“ ќе им се спротистави на САД доколку американската армија одржи заедничка воена вежба со Јужна Кореја.
– Ако САД одржат заедничка воена вежба додека и понатаму се во сила санкциите кон Демократска Народна Република Кореја, ДНР Кореја ќе им се спротистави на САД на сопствен начин за противдејствување, а САД ќе мора да ја преземат цела одговорност за последиците што ќе уследат, објави севернокорејската новинска агенција КЦНА.
Во соопштението се истакнува и дека Вашингтон се обидува да го попречи намалувањето на тензиите помеѓу Северна и Јужна Кореја.
На почетокот од април предвидена е заедничка воена вежба помеѓу американската и јужнокорејската армија.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.