„Ги следиме случувањата и процесите на институционално, општествено, локално и секакво ниво, во смисла на придонес за подобрување на состојбите со меѓуетничките односи, каде и да е тоа потребно. Изминатата година работевме на проектот „Чекор напред кон мултикултурно општество“ и тоа во правец на приближување на нашите ставови, со ставовите на институциите , општеството и политичките чинители, во однос на почитување на различностите, во однос на тоа што значи негување на мултикултурноста, препознавањето на различното, антинационализмот и секако, низ нашата работа низ разговор и со граѓаните низ цела држава. Меѓу другото, ја следевме и работата на новата стратегија ‘Едно општество за сите’, и дадовме наши препораки“, вели меѓу другото Дијана Тахири од ЦИВИЛ на мултимедијалниот и медиумскиот настан организиран од ЦИВИЛ и интегрираната редакција на ЦивилМедиа „Перспективи 2023“.
Според неа, меѓуетничките односи навидум се мирни, нема некакви тензии какви што имаше во еден одреден период пред години, меѓутоа, има нешто друго. „Луѓето, не само по етничка основа, туку и интра-етнички се оддалечуваат едни од други. Различната култура не се познава доволно, но полека, се прифаќа. Низ бројните настани, една од темите која ја чепнавме беше и алатката за вработување, балансерот, и злоупотребата на оваа алатка.
Колку и да е злоупотребен, а за што добивме гаранции дека ќе се работи на нов механизам кој ќе спречи злоупотреба, преку балансерот се постигна меѓу другото, луѓето да се навикнат на фактот дека на работните места не преовладува една етничка заедница, а се надевам дека во блиска иднина нема да имаме потреба за таква алатка, односно процентуално застапување, туку вработувањата ќе бидат врз други основи и без никаква дискриминација, а тоа е нешто на кое треба сите без исклучок, да работиме заедно“, појаснува Тахири.
Таа вели дека нејзина лична, но и организациска заложба е во иднина да се поттикне желбата за препознавање на културата на другиот, па потоа доаѓа и почитувањето на таа различност. Ако постои желбата да се знае како живее другиот, во домашни услови, со друга културолошка подлога, да се следат и медиумите на јазиците на другите етнички заедници, за да се фати ритамот и препознае различноста. Да се дружиме малку повеќе надвор од тоа што е работна обврска. Посебно младите, тие навидум најмалку имаат проблем со другите, но тоа само кога работат заедно, но, кога е градот поделен, кога општината е поделена, кога е поделено селото, тогаш имаат проблем, не се познаваат. Тука треба да поработат првенствено семејствата, институциите, а највеќе образовниот систем, и тоа час поскоро, заклучува Тахири.
С. Танеска/Д. Тахири
Камера: Александар Ризински
Монтажа: Ариан Мехмети
