Тантуровски на позицијата претседател на ДКСК е од 2016, а од 14 април 2015, како и останатите, член на истата. Претходно бил заменик претседател на ЈЗУ Здравствен дом Железничар, според биографијата, во период 2013-2014.
Но, со малку истражување, се доаѓа до податок дека од таа функција е разрешен на 11 април 2017 година, поради истек на мандатот како претставник на основачот – Владата (Службн весник на РМ, бр. 54/1012), а се именува Драган Ласков. Тенка е линијата, но спомнежот за конфликт на интереси е оправдан.
Имено, при преземање на функцијата член на ДКСК, Тантуровски, според законот мора да пополни анкетен лист и изјава за интереси, врз основа на Законот за спречување судир на интереси.
Од информациите со кои располага ЦИВИЛ, на прашањето дали извршува јавни овластувања и должности освен како член на ДКСК, Тантуровски одговара со НЕ. 
Управниот одбор на ЈЗУ Здравствен дом Железничар, се сосотои од членови од тројца претставници од основачот т.е. Владата и двајца претставници од здравствениот дом.
Во сегашниот Управен одбор на ЈЗУ Здравствен дом Железничар, може да се забележи дека не фигурира ни лицето Драган Ласков. Инаку, ако го изгуглате Ласков, освен во контекст на негово именување и замена на Тантуровски, името се појавува и како претседател на У.З. „Расадник“ , Општина Кисела Вода. Дали се работи за истото лице, допрва треба да се истражи.
Што се однесува до Тантуровски, во изјава за медиумите, вели дека никаде во Ревизорскиот извештај не е посочен лично на одговорност на некои неправилности, а за самиот извештај вели дека немал потреба за објавување бидејќи бил за интерна употреба со насоки каде Антикорупциска треба да се поправи.
Да потсетиме, пред неколку часа ЦИВИЛ излезе со информации дека во самиот извештај има делови во кои токму претседателот на ДКСК се повикува на одговорност: „За нејаснотиите околу намената за трошење и да не говориме, бидејќи не се знае за што се трошеле тие пари, не постојат извештаи. Со оглед на фактот дека ваквите исплати се одлучени на Седница на ДКСК, одговорноста ја носи претседателот Тантуровски“.
Биљана Јордановска
