Одредени вести и информации едноставно можеме да ги објавиме во рубриката САТИРА. Преку сатирата, се обидуваме да ги покажеме проблематични аспекти во нашата земја на забавен и остар начин, но истовремено да предизвикаат свест за сериозноста на тие проблеми.
Во продолжение објавуваме ТОП сатири во изминатата 2024 година.
Хаосот со вадење на нови документи е всушност стратегија за граѓаните да не избегаат од државата!
Турканици, нервози, пцуење, колнење, запознавање, шмекање… се на едно место пред пунктовите за издавадење на нови лични документи со придавката Северна. Наши извори од МВР, кои сакаат да останат анонимни, велат дека оваа навидум хаотична ситуација со вадењето на нови лични карти и пасоши, всушност е ПР стратегија за граѓаните да не се отселат од државата.
„Имаме дојава дека оваа година е клучна, односно, ако не направиме нешто да ги задржиме граѓаните во нашата земја, особено младите, дека по изборите ќе ни се отселат од државата. Затоа решивме да создадеме т.н. контролиран хаос, за младите да можат да останат тука да работат, да творат, да се развиваат, да се размножуваат…“.
Бате Саше од денес е слободно и невработено лице, „не знам како ќе функционираме без возач“ – вели директорот на затворот
Од денеска бате Саше е слободно и невработено лице. Поранешниот шеф на УБК, Сашо Мијалков, утрово, се одјавил од струшкиот затвор, каде што издржуваше казна за случајот „Империја“.
„Нù замина најдобриот и најпримерниот работник, нашиот возач кој нагалено го викавме „транспортер“. Го почитуваше куќниот ред, беше добар пример и за другите осуденици, им помагаше и на останатите во работните ангажмани внатре во затворот, во средување на паркот. Сите се навикнавме на него, просто не знам како ќе функционира затворот без него“, вели за Сатира, директорот на казнено-поправниот дом.
Се бара национален координатор за борба против комарци
Годинава комарците буквално ни ја исцицаа крвта, чиниш се некои потомци на Дракула. Неспособноста на мајката на Градот да се избори со овие мали крвопијци ја натера Владата да креира работна позиција Национален координатор за борба против комарците.
„Злите јазици ќе кажат ‘еве смислиле уште едно небитно работно место само за да ухлебат уште некој џаболебар’. Но, вистината е дека ние се грижиме за здравјето на народот. Па не може човек да излезе на тераса, да шета во парк, да отиде во викендица да седи на раат, комарците ќе го отечат. Башка тие што се алергични. Затоа оваа Влада е одлучна да им застане на патот и да се избори со овие мали чудовишта“, вели анонимен извор за рубриката Сатира.
Дафина: Не сум богаташка, шест стана – богатство ли е?
Скромниот левичар, пратеникот Димитар Апасиев кој од точак се качил на џип, ја нарече пратеничката на ВМРО-ДПМНЕ, Дафина Стојановска – „почитувана богаташе од гостиварско со 6 стана и една викендица“.
На ваквите обвинувања пратеничката од гостиварско (која и покрај неколкуте стана во Скопје, сепак лапа патни трошоци), одговори дека не може „наркомани да и се обраќаат со почитувана богаташке, бидејќи точно знае од каде и се становите, додавајќи „моите шест стана имаат уредно имотно потекло“.
„Не може да ме нарекува богаташке, уште и почитувана, кога знам дека не ме почитува. Денес секој може да биде богаташ(ка) како мене, па 6 стана – богатство ли се? Богаташка ќе бидам ако поседувам јахта, приватен авион, хелихоптер или ако имам приватен остров, како на пример тој милионерот од Дубаи што и купи цел остров на жена му за да може да се сунча во бикини“, вели пратеничката од ВМРО-ДПМНЕ ексклузивно за рубриката САТИРА.
Д. Муратов
