ЦИВИЛ ве води „Зад димната завеса“, ги обелоденува фактите и ги разобличува дезинформациите и пропагандата. Ова видео е новиот трејлер што ги најавува и придружува видео содржините што ги продуцира тимот на ЦИВИЛ во напорите да ги ублажи последиците од интензивните дезинформативни и пропагандни операции во Северна Македонија.
Вака гласи најавата на ЈуТуб каналот на ЦИВИЛ за серијата настани и видео прилози под заеднички назив „Зад димната завеса“.
Секој ден, Мониторинг тимот на ЦИВИЛ подготвува извештај за дезинформациите и пропагандата чија мета се демократските институции, граѓанското општество, медиумите и прогресивните групи и поединци во нашата земја и пошироко. Со трејлерот објавен на медиумската платформа која секојдневно е извор на релевантни информации, вести, анализи и ставови, јавноста се потсетува дека организацијата продолжува со своите заложби да помогне во справувањето со дезинформациите и пропагандата. Цивил Медиа обединува повеќе интернет портали на македонски, албански и англиски јазик, а освен за продукција на вести и анализи, таа претставува и своевидна платформа за општествен и политички дијалог и граѓанска едукација.
„Зад димната завеса“ е проект за медиумска и граѓанска акција против дезинформациите и пропагандата што го имплементира ЦИВИЛ – Центар за слобода. Проектот се фокусира на странската, антизападна пропаганда преку мониторинг, анализи и обелоденување на дезинформациите и пропагандата за критични теми, како што е агресијата врз Украина, евроатлантските интеграции и други процеси од круцијално значење за нашата земја.
Критичните процеси за земјата и нејзините стратешки интереси се мета на долготрајна пропаганда од истите меѓусебно поврзани центри. Пропагандните центри имаат една заедничка цел – поткопување на владеењето на правото, демократијата, стабилноста и евроатлантската ориентација на земјата. Затоа, ЦИВИЛ континуирано презема сеопфатни активности да се спротивстави на тие тенденции. Активностите во проектот вклучуваат специфична комбинација од продукција на вести и објавување ставови, проверка на факти и обелоденување на дезинформациите и пропагандата.
Проектот подразбира секојдневно објавување на релевантни вести, анализи и ставови, неделни јавни настани и презентации, соработка со релевантни граѓански организации, директна комуникација со граѓанките и граѓаните, соработка со локалните медиуми и со други засегнати страни.
ЦИВИЛ Тим за комуникации