Најновиот извештај на Меѓународниот институт за истражување на мирот (СИПРИ) од Стокхолм, покажува дека во изминатите пет години, трговијата со оружје значително расте, и од крајот на Студената војна до денес, достигнува најголем обем. Во периодот од 2012 до 2016 година, најголеми извозници на оружје продолжуваат да бидат САД со 33% и Русија 23% од вкупниот светски извоз.
„Стабилноста и безбедноста се сериозно нарушени на глобално ниво. Педесет и шест крвави воени конфликти низ целиот свет се активни во овој момент. Бегалски кризи, интензивирани терористички напади, тензиите на релација Русија – ЕУ, верските конфликти и економската криза се фактори што придонесуваат побарувачката од оружје да се зголемува. Како една од најстарите организации-членки на Меѓународната акциска мрежа за малото оружје (IANSA), како и на ‘Коалицијата Контрола на оружјето’ (Arms Control Coalition) предводена од ‘Амнести Интернешенел’, ние внимателно ги следиме овие трендови и можеме да ја споделиме нашата проценка со јавноста – дека овој тренд на побарувачка на оружје ќе биде во нагорна линија во наредните години“, смета Џабир Дерала, претседател на ЦИВИЛ – Центар за слобода.
„Македонија и земјите од Балканот се соочуваат со сериозни ризици за стабилноста и безбедноста и не се исклучок од глобалните трендови. Напротив, ние сме дел од земјите што се соочуваат со проблеми, но и дел од проблемот со кој се соочува современиот свет, поради неуспехот на политичките елити да се справат со корупцијата и со погубните политики на поделби и криминално владеење“, вели Дерала, како одговор на прашањето, до која мера Македонија и регионот, се засегнати од овој глобален тренд.
Истражувањето на СИПРИ, покажува дека САД снабдуваат со оружје над 100 земји во светот, и тоа со воени авиони, прецизна муниција, па до најновата генерација на противвоздушни и ракетни одбранбени системи. Речиси половината од американскиот извоз на оружје била насочена кон Блискиот Исток.
Русија, испорачувала оружје главно во Индија, Виетнам, Кина и Алжир.
По САД и Русија, следува Кина со 6,2 % од извозот на оружје, но со пораст на извезеното оружје од 74%.
Германскиот извоз на оружје во последните пет години бележи намалување за 36%. Во периодот од 2012 до 2016 година. Германија извезувала оружје во 60 држави.
