Во Чаир, членови на Левица вчера (12 јули 2023), пред сопствените камери, ја вандализираат табелата со натписот на новиот „Парк Украина“, кој беше промовиран пред еден месец на иницијатива на Општина Чаир, во соработка со Украинската амбасада, со поддршка од ЦИВИЛ и други граѓански и хуманитарни групи и организации. Овој чин е симбол на солидарноста со украинскиот народ во нивната борба за слобода од руската агресија и окупација.
Имено, оштетувањето и самоволното „преименување“ на Паркот Украина во Чаир, не претставува само еден обичен чин на вандализам, се вели во соопштението од ЦИВИЛ.
„Со јасна и груба злоупотреба на еден светол поим, како што е АСНОМ, политичките вандали од екстремната десница сакаат да предизвикаат омраза и поделби, наспроти благородниот мотив што стои зад именувањето на Паркот Украина. Воедно, тие не ја кријат својата намера да ја омаловажат волјата на локалната самоуправа, како и на граѓанките и граѓаните на општина Чаир и пошироко, да ѝ оддадат признание и почит на борбата на Украина за слобода.
Не е случаен изборот на локацијата и името на паркот, бидејќи Левица не ја кријат својата поддршка и приврзаност кон нивниот идол, воениот злосторник и диктатор Путин“, велат од организацијата.
ЦИВИЛ бара од релевантните институции, во прв ред МВР, итно да покрене постапка за санкционирање на сторителите на овој подмолен чин, не само поради вандализмот, туку и поради пропагандата со која се промовираат агресијата, злосторствата, омразата и поделбите меѓу луѓето и нациите. Тие не се анонимни, туку самите се снимиле и се промовираат на социјалните мрежи, така што релевантните институции не би требало да имаат проблем при подготовка на своите законски постапки. ЦИВИЛ очекува остра и законита реакција во овој и слични случаи, повикуваат од оргнаизацијата.
„Ваквиот чин е неприфатлив и заслужува крајна осуда и од јавноста, потенцираат од ЦИВИЛ“.
Инаку, ЦИВИЛ е организација за човекови права која постои веќе 24 години. Визијата на ЦИВИЛ е за свет во кој сите луѓе живеат во мирно и демократско општество.
