Во последните недели, Украина нагло го забрза темпото на напади во и околу привремено окупираниот полуостров Крим, кој стана критичен центар за руската војска.
Русија го користи најголемиот град на Крим, Севастопол, како примарна база за Црноморската флота, која ги блокира украинските пристаништа. Украина долго време тврди дека војната не може да се добие без да се насочат нападите кон руските операции на Крим, пренесува Њу Јорк Тајмс.
Украинската војска тврди дека погодила рускиот систем за ракетна одбрана земја-воздух на Крим и два руски воени бродови во Црно море, додека во комбиниран напад со дронови и проектили беше погодено бродоградилиштето во Севастопол на Крим при што беа оштетени пристаништето, воен брод и подморница. Како мастерклас по оперативна уметност и вреден трофеј одземен од под рускиот нос е враќањето на контролата врз нафтените платформи лоцирани во северозападниот дел на Црното Море и во близина на Крим, познати како Бојко кули, кои беа окупирани и претворени во воени бази од Русите од 2015 година.
Според Телеграф кој се повикува на украински извори, уништен е еден од најсофистицираните руски системи за противвоздушна одбрана во комплексен ракетен и беспилотен напад во окупираниот Крим во четвртокот, оставајќи ја Московската Црноморска флота „речиси целосно без одбрана“,
Разузнавачки извори тврдат дека нападот, извршен од кијивската безбедносна служба СБУ и морнарицата, погодил систем С-400 – вреден 1 милијарда фунти – и систем С-300 во Евпаторија, западно од полуостровот под контрола на Кремљ.
Снимките распространети на социјалните мрежи покажаа џиновска огнена топка која го осветлува небото во зората над градот, кој е стотици милји зад непријателските линии.
Руското Министерство за одбрана тврди дека соборило 11 беспилотни летала и спречило посебен напад на поморски патролен брод во Црното Море.
Но, Рајбар, воен канал кој го поддржува Кремљ, опиша внимателно организиран напад од украинските сили, користејќи беспилотни летала за да го изложат системот за воздушна одбрана и да ги исцрпат неговите резерви на муниција пред да зададат неколку разорни удари со модифицирани крстосувачки ракети.
„Прво, 11 дронови беа лансирани од периферијата на Одеса“, објави каналот. „Беспилотните летала беа соборени од екипажот на 31. воздухопловни сили и дивизија за воздушна одбрана околу 5.30 часот над Јевпаторија. Приближно во 5.50 часот, украинските вооружени сили погодија… со противбродска ракета Р-360 Нептун.
Дополнително, како што објави воената управа за стратешки комуникации, утрото на 14 септември украинските сили погодиле два руски патролни брода од типот „Васили Биков“, пренесува Кијив Индипендент.
Бродовите кои биле стационирани во југозападниот дел на Црното Море претрпеле „одредени штети“, напиша Дирекцијата без дополнителни детали.
Бродовите „Василиј Биков“ се големи патролни корвети на руската морнарица, опремена со поморски топови, преносни системи за противвоздушна одбрана и тешки митралези.
Руските сили употребија брод „Василиј Биков“, заедно со потонатиот крстосувач „Москва“, за да го нападнат украинскиот Змиски остров на првиот ден од целосната инвазија.
Црното Море доживеа ескалација на непријателствата по едностраното раскинување на договорот за жито од страна на Русија.
Кога Русија почна да ги гаѓа украинските пристаништа и земјоделската инфраструктура, руските власти исто така известија за голем број украински напади врз цели во окупираниот Крим и руските поморски бази.
На 13 септември, во украинскиот напад во текот на ноќта врз бродоградилиштето во Севастопол на Крим при што се погодени и оштетени два брода, меѓу кои, наводно и подморницата од класата Кило
Според портпаролот на морнарицата на Украина, Дмитро Плетенчук, украинските сили веќе исфрлиле од акција пет големи руски воени десантни пловила.
На почетокот на оваа недела, Специјалните сили на Главната управа за одбранбено разузнавање на Украина (ГУР) успеаја да ја вратат контролата врз нафтените платформи лоцирани во северозападниот дел на Црното Море и во близина на Крим. Платформите, колоквијално познати како Бојко кули, беа окупирани и претворени во воени бази од Русија од 2015 година.
Како што пренесува Дифенс експрес, ГУР објави видео во кое се наведува дека украинските извидници ги вратиле назад платформите за дупчење наречени Петро Ходованец и Украина, како и платформите за џекап Таврида и Сиваш.
Освен тоа, за време на операцијата беше заробена разновидна руска опрема, вклучително и ненаведувани авионски ракети, како и вредниот трофеј – радар за надзор Нева-Б, дизајниран да открива и следи цели над површината на водата. Одбранбеното разузнавање потсети дека Русија ги користела платформите за дупчење нафта и како хелиодроми, а таму чувала поврзано оружје и гориво.
Командантот на групата специјални сили на Одбранбеното разузнавање на Украина, со кодно име Пеин, во интервју за новинарите на 1+1 ги откри деталите за операцијата за враќање на Бојко Кулите.
„Ние ја подготвувавме специјалната операција околу месец и половина. Разбравме дека тоа може да биде еднонасочно патување затоа што само будалата и покојникот не се плашат. Бевме на чамец на надувување затоа што е повеќе маневрирачки и помалку видлив за воздушните средства“, објасни Пеин.
За време на извршувањето на борбената мисија, украинската извидничка група наишла на руски борбен авион и успешно го соборила со помош на MANPADS.
„Кога почнавме да се закотвуваме, авионот почна да ги ангажира нашите ловци. Бродот беше малку оштетен. Еден таков проектил можеше да не потопи. Имавме еден истрел кој го погоди (авионот) во делот од опашката. Видовме карактеристичен чад – прво бел, а потоа црн“, се сеќава извидникот.
Тој додаде дека одбранбеното разузнавање на Украина открило руска муниција и вредна опрема на нафтените платформи за извидување во западниот дел на Црното Море.
„Системот Нева што го фативме е опрема што може да се отвори и испита за софтвер. Таму има многу корисни информации кои можат да дадат одговори на нашите прашања“, објасни командантот.
Враќањето на Бојковите кули под украинска контрола е болен удар за влијанието на државата агресор во Црното Море.
„Во голема мера ги ограничивме дејствата на Русите во водите на Црното Море, особено во водите на Змискиот остров. Ги притиснавме поблиску до брегот на Крим“, истакна тој.
Во исто време, Пеин посочи дека непријателот може да се обиде да го врати изгубеното, но украинските специјални сили се подготвени за такво сценарио.
